SKÝRSLAN: Tíu HK-ingum sökkt á Hlíðarenda
Hvað réði úrslitum?
Það er rosalega erfitt að spila við eins gott lið og Val þegar þú ert einum færri. HK gerði vel í fyrri hálfleik en þegar í seinni hálfleikinn var komið var þetta bara of erfitt fyrir HK og Valur gekk frá þessu í rólegheitunum.
Bestu leikmenn
1. Jónatan Ingi Jónsson
Jónatan Ingi setti tóninn strax í upphafi þegar hann sótti rauða spjaldið. Hann skoraði þrennu í dag og óhætt að segja að þetta hafi líklega verið hans besti leikur síðan hann kom til Vals.
2. Gylfi Þór Sigurðsson
Gylfi skorar tvívegis í dag og hefði getað skorað fleiri mörk. Hann er svo langbestur í þessari deild og það er mjög erfitt að eiga við hann. Hann var bersýnilega nokkuð svekktur að ná ekki að klára þrennuna.
Atvikið
Ég hef rætt rauða spjaldið nóg hér og ætla að nefnast á það þegar Atli Þór Jónasson var nálægt því að skora eitt af mörkum sumarsins í upphafi seinni hálfleiks. Ögmundur varði stórkostlega og Valsmenn skoruðu þriðja markið skömmu síðar.
Hvað þýða úrslitin?
Valur er áfram í þriðja sæti. Víkingur og Blikar misstigu sig í dag og því eru Valsarar ekki endilega dauðir úr öllum æðum í toppbaráttunni. HK eru í fallsæti ásamt Fylki en næsti leikur liðsins er einmitt gegn Fylki.
Vondur dagur
Ívar Örn Jónsson gerði heimskuleg mistök þegar hann rífur Jónatan niður eftir 10 mínútna leik. Eins og Ómar sagði var færið frekar þröngt og Petersen hefði getað varið. Ívar hefði hið minnsta átt að gera tilraun við boltann því þá hefði litur spjaldsins verið annar.
Dómarinn - 8
Ekkert við Ella að sakast í dag. Hárrétt að reka Ívar útaf í upphafi leiks.