SKÝRSLAN: Stórkostleg frammistaða Blika
Hvað réði úrslitum?
Eins og svo oft þegar Blikarnir spila þá eru gæði bara töluvert meiri. Aðeins eitt mark skildi að í hálfleiknum en munurinn hefði átt að vera meiri. Blikarnir keyrðu svo yfir þetta í seinni hálfleiknum og skoruðu góð mörk.
Bestu leikmenn
1. Andrea Rut Bjarnadóttir
Andrea var frábær í dag, var sífellt ógnandi og hefði átt að skora fleiri mörk en þarf að sætta sig við þetta eina. Lagði upp eitt og átti stóran part í fjórða markinu einnig.
2. Vigdís Lilja Kristjánsdóttir
Kom inná fyrir meidda Birtu Georgsdóttur, kom sér strax í hættulegar stöður og hefði getað skorað í fyrri hálfleiknum. Byrjaði svo seinni hálfleikinn á því að leggja upp gott mark fyrir Andreu áður en hún skoraði svo sjálf.
Atvikið
Vítadómurinn í fyrri hálfleiknum. Twana lét nægja að lyfta aðeins gulu spjaldi en mér fannst þetta verðskulda rautt spjald í ljósi þess að ekki var gerð tilraun til þess að vinna boltann. Birta Georgs þurfti að fara meidd útaf í kjölfarið.
Hvað þýða úrslitin?
Blikar halda áfram að elta Valsarana sem eru stigi á undan Blikum. Víkingar sitja í 4. sæti stigi á eftir Þór/KA.
Vondur dagur
Víkingar áttu ekki góða innkomu inn í seinni hálfleikinn er þær fengu á sig tvö mörk með stuttu millibili sem gerði útum vonir þeirra um að fá eitthvað fyrir sinn snúð úr þessum leik.
Dómarinn - 7
Fínt yfir það heila hjá Twana en mér fannst að hann hefði átt að víkja Ernu af velli fyrir brot hennar þegar hún fékk á sig vítaspyrnu.