Keflavík gerði meira og gerði það betur en Fjölnir í dag og þar skilur fyrst og fremst á milli þegar upp er staðið. Þeir refsuðu grimmilega fyrir mistök Fjölnis á meðan að gestirnir úr Grafarvogi unnu oft á tíðum illa úr sínum tækifærum.

Annað mark Keflavík í blábyrjun síðari hálfleiks var vendipunktur leiksins að mati Úlfs þjálfara Fjölnis. Ég er honum hjartanlega sammála þar.

Keflavík endar mótið í 2.sæti deildarinnar með 38 stig og mætir liði ÍR í undanúrslitum umspilsins. Fjölnir í 3.sæti með 37 stig og mætir Aftureldingu.

Fjölnisliðið átti ekki sinn besta dag í dag á vellinum. Hvort heldur sem er varnar og sóknarlega. Það svíður sennilega enn meira að ganga af velli eftir svona tap að vita að sigur hefði tryggt sæti í Bestu deildinni svo Fjölnismenn sem heild geta talist hafa átt vondan dag. Þá er ég ekki að taka leikmenn eitthvað sérstaklega fyrir heldur deila þjálfara, stjórnarmenn sem og stuðningsmenn þessu með þeim. Keflvíkingar eru örugglega líka margir hverjir svekktir þegar þeir horfa yfir mótið. Yfir slaka byrjun, jafntefli í leikjum sem liðið hreinlega átti að vinna og ýmislegt. En það er engum hollt að lifa í fortíðinni og spá í hvað hefði gerst ef þetta eða hitt hefði raungerst. Framundan er umspil hjá báðum liðum og það eitt skiptir máli.

Pétur sjálfur átti fínasta dag á flautunni út frá hlutleysi séð. Leyfði mikið og leyfði mönnum að takast á. Segir kannski ýmislegt að ekki einn leikmaður fékk spjald í leiknum þótt starfsmaður á bekk hafi vissulega fengið að líta rautt spjald. Það eru þó ein stór mistök hjá tríóinu í leiknum. Fyrsta mark leiksins átti bara alls ekki að standa. Sjónvarpsmyndir sýna vel að Mihael Mladen var rangstæður í sóknaruppbyggingu Keflavíkur þegar hann fær boltann og leggur hann á Sami Kamel sem á stoðsendingu á Kára Sigfússon. Klár mistök hjá Guðna Frey Ingvasyni aðstoðardómara 1 þar. Hefði það samt einhverju breytt um niðustöðu leiksins? Systurnar ef og hefði geta rifist um það en mér finnst það harla ólíklegt.