Spáð í spilin Jóhann Skúli Jónsson sem heldur úti Svona var sumarið hlaðvarpinu og gerði upp ævintýri U21 landsliðsins sem fór í lokakeppni EM árið 2011 í nýjasta þættinum, spáði í 2. umferð Bestu deildarinnar eftir tvískiptinguna.
Stjarnan 2 - 2 ÍA (mánudagur 19:15)
Andri Adolphs er með SB5 grenjandi ofan í hálsmálið á sér alla daga og mætir óvænt illa reiður og fullur af orku til leiks og kemur Stjörnunni í 2-0 í fyrri hálfleik. Skaginn jafnar þetta svo einhvern veginn.
Heiðursgestur: Árni Gautur Arason eða King Bjarni Sig ég get ekki gert upp á milli.

Þriðja liðið Einn af betri dómurum sumarsins, Elías Ingi Árnason, dæmir þennan stórleik í Garðarbænum í kvöld en honum til aðstoðar verða þeir Kristján Már Ólafs og Ragnar Þór Bender. Vilhjálur Alvar Þórarinsson er skiltadómari en Skúli Freyr Brynjólfsson er eftirlitsmaður KSÍ í dag.

Stórleikur - Úrslitaleikur um Evrópu? Í ljósi þess að Valur töpuðu í gærkvöldi gegn Víkingum er þessi leikur enn stærri. Ef Stjarnan vinnur í dag eru Garðbæingar einu stigi frá Val í 3. sætinu en ef Skagamenn vinna eru þeir tveimur stigum frá 3. sætinu. Jafntefli myndi því gera lítið fyrir bæði lið en ef annað liðið vinnur er þessi barátta um 3. sætið orðin miklu meira spennandi.

Garðarbærinn heilsar! Heilir og sælir ágætu lesendur og veriði hjartanlega velkomin í þessa þráðbeinu textalýsingu frá leik Stjörnunnar og ÍA í Garðarbænum. Þetta er seinasti leikur í 2. umferðinni eftir tvískiptinguna.