SKÝRSLAN: Leikur sem bauð upp á allt í Garðabænum
Hvað réði úrslitum?
Stjarnan skoraði fleiri mörk er það sem réði þessu. Fyrri hálfleikurinn var kaflaskiptur. Stjörnumenn komu vel gíraðir til leiks og voru miklu betri fyrstu 20 mínútur leiksins, síðan jafnaðist leikurinn og FH vaknaði til lífsins og komust inn í leikinn og sköpuðu sér færi. Stjörnumenn komu sterkari til leiks í síðari hálfleikinn og komust 2-0 yfir og þá var brekkan orðin brött fyrir FH sem sýndu þó karakter og náðu að minnka muninn á 90 mínútu og reyndu að finna jöfnunarmarkið en Stjörnumenn héldu út.
Bestu leikmenn
1. Örvar Eggertsson (Stjarnan)
Örvar Eggertsson var mjög góður í kvöld. Þegar hann fékk boltann þá skapaðist alltaf hætta en hraði hans er ekkert grín fyrir andstæðinginn. Skoraði og átti stóran þátt í öðru markinu.
2. Árni Snær Ólafsson (Stjarnan)
Reyndi kannski ekkert svakalega mikið á Árna í kvöld en þegar það reyndi á hann þá gerði hann virkilega vel. Greip vel í fyrirgjafir og gerði vel að verja frá Sigurði Bjart undir lok leiks í kvöld.
Atvikið
Fyrsta mark Stjörnunar er mjög umdeilt. Benedikt Warén tók aukaspyrnu inn á teiginn á Örvar Eggertsson sem náði skalla í átt að marki. Vilhjálmur Alvar ætlaði ekki að dæma mark en það var línuvörðurinn sem lyfti upp flagginu og dæmdi markið.
Hvað þýða úrslitin?
Stjarnan er komið á blað í Bestu deildinni árið 2025. FH þarf að bíða að minnsta kosti fram í aðra umferð eftir að komast á blað.
Vondur dagur
Það vita flestir að KJartan Kári býr yfir ofboðslegum hæfileikum og mér fannst þeir hæfileikar ekki alveg vera til staðar á Samsungvellinum í kvöld.
Dómarinn - 7
Vilhjálmur Alvar og aðstoðarmenn hans dæmdu þennan leik bara nokkuð vel. Eina spurningamerkið er þetta umdeilda atvik þegar Stjarnan komst yfir í leiknum.