SKÝRSLAN: Glórulaus Gylfi en stigin þrjú þó í Víkina
Hvað réði úrslitum?
Víkingar eru betra lið en ÍBV. Það er staðreynd eins og staðan er í dag. Þeir gátu leyft sér að eiga ekki sinn besta dag en standa samt uppi sem sigurvegarar og það sanngjarnir. Eyjamenn vörðust fimlega en að endingu reyndist það ekki nóg og gæði Víkinga tryggðu þeim sigurinn.
Bestu leikmenn
1. Sveinn Gísli Þorkelsson
Sveinn Gísli heillaði mig í kvöld og hefur heldur betur vaxið inn í stærra hlutverk í liði Víkinga. Varðist vel og af krafti og gaf góða stoðsendingu þess utan.
2. Gunnar Vatnhamar
Það væri alveg hægt að víxla Sveini Gísla og Gunnari í sætum. Báðir voru frábærir. Það er minn dragbítur þó að hafa mögulega hærri standard á Gunnar. Marcel Zapytowski markvörður ÍBV kom líka til greina hjá mér en hann átti nokkrar stórgóðar vörslur í fyrri hálfleik.
Atvikið
Rauða spjaldið á Gylfa stendur uppúr í annars tíðindalitlum leik heilt yfir. Glórulaus tækling í alla staði en víkjum ögn betur að því hér síðar.
Hvað þýða úrslitin?
Víkingar hefja sína stigasöfnun þetta árið og jafna Blika á toppi deildarinnar á stigum og markatölu. Eyjamenn stigalausir og fátt meira um það að segja.
Vondur dagur
Gylfi Þór Sigurðsson skuldlaust. Hafði verið ágætur framan af og talsvert í boltanum þegar hann tekur þessa glórulausu ákvörðun að henda sér í tæklingu aftan frá á Bjarka Björn. Hefði svo auðveldlega getað kostað Víkinga sigurinn í dag en sem betur fer fyrir Gylfa og Víkinga varð sú ekki raunin. En algjörlega galin ákvörðun hjá jafn reynslumiklum leikmanni sem hefur ekki fengið rautt í rétt um áratug að henda sér í svona tæklingu.
Dómarinn - 9
Ég hef nákvæmlega ekkert upp á Helga Mikael að klaga. Rauða spjaldið var hárrétt ákvörðun frá mínum bæjardyrum séð og leikurinn vel dæmdur að mínu mati.