SKÝRSLAN: KA skildi FH eftir á botninum
Hvað réði úrslitum?
FH-ingar voru steinsofandi eftir að hafa jafnað leikinn í 2-2 og því fór sem fór. Varnarleikur liðsins var glórulaus í sigurmarki Bjarna Aðalsteinssonar, sem að kláraði færi sitt glæsilega og fögnuður KA manna gríðarlegur.
Bestu leikmenn
1. Guðjón Ernir Hrafnkelsson (KA)
Var afar öflugur í hægri bakverðinum í dag. Upp og niður allan leikinn og öruggur í sínum aðgerðum.
2. Bjarni Aðalsteinsson (KA)
Skoraði sigurmark KA og var óþreytandi í hlaupum sínum í gegnu miðjuna og aftur fyrir vörn FH. Flottur í dag.
Atvikið
Á erfitt með að velja á milli sigurmarksins og fyrsta marks leiksins sem að Hrannar Björn skoraði. Gef Hrannari þetta þar sem að heil 6 ár eru liðin síðan að Húsvíkingurinn skoraði síðast deildarmark! Afar snyrtilegt mark hjá honum.
Hvað þýða úrslitin?
KA menn eru komnir upp í 8. sætið, allavega tímabundið og eru þar með 4 stig. Þeir mæta ÍA á Skaganum í næsta leik. FH-ingar eru nú neðsta lið deildarinnar með 1 stig og eiga heimaleik gegn Val í næstu umferð.
Vondur dagur
Það er erfitt að henda þessu á einhvern. En Heimir Guðjónsson hugsar FH liði sínu sennilega þegjandi þörfina eftir þetta sigurmark Bjarna. Það er fátt meira niðurdrepandi en að vinna sig aftur inn í leik, einungis til þess að glutra því niður hálfri mínútu seinna.
Dómarinn - 8
Fannst Arnar góður í dag. Setti línu og fylgdi henni.