SKÝRSLAN: Fyrirliðinn fór fyrir FH liðinu sem tyllti sér á toppinn
Hvað réði úrslitum?
Það er mikil einföldun að segja að Arna Eiríksdóttir hafi verið munurinn á liðunum en stundum er einföldunin fegurðin á bakvið allt saman. FHL hóf seinni hálfleikinn af miklum krafti en þriðja mark FH í leiknum gerði endanlega útum þennan leik.
Bestu leikmenn
1. Arna Eiríksdóttir
Skoraði fyrstu tvö mörk leiksins og stýrði vörn FH með myndarskap.
2. Rósey Björgvinsdóttir
Rósey hjartað í varnarleik FHL. Stöðvaði margar sóknir FH í leiknum en tvö af þremur mörkum FH komu úr hornspyrnu og langri fyrirgjöf frá hægri. Rósey var með sóknarmenn FH í gjörgæslu. Lítið sást til Elísu og Maya Hansen í opnum leik FH.
Atvikið
Arna Eiríksdóttir kom FH-liðinu yfir strax í upphafi leiks. Fyrirgjöf frá hægri sem endaði í markinu. Mjög óvænt og miðað við viðbrögð Örnu í fagninu þá kom þetta henni jafn mikið á óvart og flestum öðrum.
Hvað þýða úrslitin?
FH eru ennþá taplausar í Bestu-deildinni með sjö stig og á toppi deildarinnar um stundarsakir í það minnsta. FHL eru enn í leit af sínu fyrsta stigi.
Vondur dagur
Þrír leikmenn fóru af velli meiddir í dag. Íris Una hjá FH og þær Aida Kardovic og María Björg hjá FHL. Áhyggjuefni fyrir bæði lið sér í lagi vegna þess að FH er nýbúið að missa Vigdísi Eddu í erfið meiðsli.
Dómarinn - 8
Þetta var auðvelt verkefni fyrir Twana Khalid Ahmed.