Öruggur sigur Vals staðreynd sem fer í toppsætið með sjö stig. Viðtöl og skýrsla væntanleg.

Jasmín Erla með skot eftir snarpa sókn Vals en Jessica vel á verði og ver.

Fjórar mínútur í uppbótartíma að lágmarki.

Kimberley Dóra með hörkuskot af vítateigslínu en Tinna Brá ver virkilega vel í horn.

Gestirnir reyna og reyna en tekst ekki að finna opnanir á þéttri vörn Vals sem staðið hefur gríðarlega vel í leiknum.

Kimberley Dóra með skot úr teignum en setur boltann yfir.

Hröð sókn Vals upp völlinn. Boltinn á Jordyn úti til hægri sem finnur Fanndísi í teignum sem á skot af stuttu færi sem fer af leikmanni Þór/KA í stöngina og afturfyrir. Ekkert kemur upp úr horninu í kjölfarið.

Boltinn fær að skoppa í teignum eftir aukaspyrnu af miðlínu. Sandra María í baráttu við Natöshu en lyftir boltanum yfir markið.

Bríet Fjóla reynir skot úr teignum eftir ágæta sókn Þór/KA. Nær litlum krafti í það og boltinn örugglega í fang Tinnu.

Ragnheiður Þórunn ber boltann upp með Fanndísi sér til stuðnings. Leggur boltann fyrir Fanndísi hægra megin sem er alein og keyrir inn á teiginn, nær skotinu í fjærhornið en Jessica bjargar með góðri vörslu.

Fanndís Friðriksdóttir með fyrirgjöf frá hægri sem smellur í hendi Bríetar. Þórður hugsar sig aðeins um og bendir svo á punktinn. Réttur dómur.

Margrét Árnadóttir í hörkufæri í teig Vals. Fær boltann hægra megin í teignum og nær að leggja hann fyrir sig en skot hennar af varnarmanni og afturfyrir.

Fer rólega af stað hér líkt og í fyrri hálfleik.

Engar sjáanlegar breytingar sjáanlegar á liðunum. Gestirnir sparka okkur af stað á ný.

Hálfleikur hér á N1-vellinum eftir kaflaskiptan fyrri hálfleik. Bæði lið átt stuttar rispur en þess á milli hefur tempóið í leiknum fallið nokkuð. Komum aftur með síðari hálfleik að vörmu spori.

Uppbótartíminn er að minnsta kosti tvær mínútur.

Sandra María gerir vel úti til hægri og kemur boltanum inn á teiginn. Þar mætir Margrét í fínu færi en hittir hreinlega ekki boltann.

Fanndís með boltann fyrir frá hægri. Jordyn hristir af sér varnarmann og reynir skotið úr teignum en hittir boltann illa sem fer hættulaust í fang Jessicu.

Sandra María í óvæntu færi í teignum, Tinna Brá er mætt af línunni og reynir Sandra að lyfta boltanum yfir hana. Stefnan ekki rétt og boltinn framhjá.

Valur brunar upp í skyndisókn. Fanndís með boltann inn á teig Þór/KA þar sem Ragnheiður er alein gegn Jessicu en setur boltann beint á hana af markteig. Langbesta færi leiksins.

Sandra María í skotfæri fyrir gestina vinstra megin í teignum eftir ágæta skyndisókn. Nær skotinu en hittir ekki á rammann.

Anna Rakel með laglegan sprett að vítateig Þór/KA og ágætis skot. Jessica þó vel staðsett og á ekki í teljandi vandræðum með að handsama knöttinn.

Fanndís keyrir inn á teiginn frá hægri, nær að búa sér til pláss til að láta vaða en skot hennar beint á Jessicu í marki Þór/KA. Valsliðið ögn að bæta í tempóið eftir heldur hæga byrjun á leiknum.

Jordyn í fínu færi í teignum eftir að lið Vals vinnur boltann hátt á vellinum. Alein en nær ekki stýra skallanum á markið.

Fellur í skaut Vals.

Ragnheiður Þórunn fær boltann við vítateig Þór/KA. Jessica er mætt i skógarhlaup en Ragnheiður nær ekki að gera sér mat úr því og fer skot hennar rakleitt í varnarmann og gestirnir hreinsa.

Fer nokkuð rólega af stað hér á N1 vellinum. Liðin að þreifa fyrir sér en bæði að flýta sér um of oft sóknarlega. Ekkert hættulegt færi litið dagsins ljós.

Þetta er farið af stað. Það eru heimakonur sem hefja hér leik.

Ásgerður Stefanía Baldursdóttir, Adda, spáir í 3. umferð Bestu deildar kvenna sem fer af stað með þremur leikjum í dag en lýkur á þriðjudaginn. Um leikinn á N1-vellinum segir Adda. Valur 2-1 Þór/KA Stórleikur umferðarinnar. Valur á heimavelli tapa ekki fleiri stigium i sumar þar. Sandra Maria kemur sér á markatöfluna, Fanndís og Rakel með mörk Vals.

Þórður Þorsteinn Þórðarson er með flautuna á N1-vellinum. Honum til aðstoðar eru Guðni Freyr Ingvason og Jovan Subic. Fjórði dómari er Þorfinnur Gústaf Þorfinnsson og eftirlitsmaður KSÍ Ólafur Ingi Guðmundsson.

42 leiki hafa liðin leikið innbyrðis í efstu deild frá aldamótum. Valur hefur haft sigur í 25 þeirra, 10 hefur lokið með jafntefli og 7 sinnum hefur lið Þór/KA borið sigur úr býtum. Markatalan er svo 123-48 Val í vil.

Það er önnur ára yfir liði Vals nú í upphafi móts en síðustu ár. Brotthvarf Péturs Péturssonar af hliðarlínunni vegur þar þungt en lið Vals er nú byggt upp á öðrum gildum en undir stjórn Péturs. Liðið rétti úr kútnum í annari umferð með 2-0 sigri á FHL á Reyðarfirði eftir að hafa gert markalaust jafntefli gegn liði FH í fyrstu umferð.

Gestirnir af norðurlandi mæta til leiks í toppsæti deildarinanr með fullt hús stiga eftir tvær umferðir. Eftir sigra á liðum Víkings og Tindastóls í fyrstu tveimur umferðunum bíður nú stóra verkefnið í leik gegn Val. Sóknarlega hefur lið Þórs/KA komið vel undan vetri eins og tölfræðin sýnir enda liðið gert 6 mörk í fyrstu tveimur leikjum sínum. Liðið á þó enn inni sóknarlega en markadrottningin Sandra María Jessen hefur ekki skorað neitt af þessum sex mörkum sem liðið hefur gert nú þegar. Nokkuð ótrúlegt þegar horft er til þess að hún skoraði 22 af 42 mörkum Þór/KA í deildinni í fyrra.

Heil og sæl kæru lesendur og verið hjartanlega velkomin í þessa beinu textalýsingu Fótbolta.net frá leik Vals og Þór/KA í þriðju umferð Bestur deildar kvenna. Flautað verður til leiks á N1-vellinum klukkan 17:00.