SKÝRSLAN: Dagur Ingi til bjargar - KA daðrar við efri hlutann
Hvað réði úrslitum?
Varamaðurinn Dagur Ingi Valsson tryggði KA mönnum stigin þrjú. Það virtist sem að hvorugu liðinu myndi takast að koma inn marki í dag og það má segja að sigurmarkið hafi alveg verið í takt við það. Eftir mikinn hamagang og darraðadans náði Dagur að koma boltanum yfir línuna, en enginn afgangur var af því.
Bestu leikmenn
1. Hjörvar Daði Arnarsson (ÍBV)
Átti stórleik í sínum fyrsta leik í efstu deild karla. Sýndi mögnuð tilþrif og var öruggur í öllum sínum aðgerðum. Það verður ekki við hann að sakast þegar rýnt er í hvers vegna ÍBV tapaði þessum leik.
2. Steinþór Már Auðunsson (KA)
Stubbur átti nokkrar afar mikilvægar vörslur á hinum enda vallarins fyrir heimamenn. Stuttu fyrir sigurmarkið ver hann gott skot Bjarka Björns Gunnarssonar sem að var sloppinn einn í gegn. Traustur.
Atvikið
Hægt er að nefna sigurmarkið. En einnig má benda á algjört dauðafæri Ásgeirs Sigurgeirssonar í fyrri hálfleik. Ég ímynda mér að framherjinn öflugi muni ekkert renna oft yfir endursýningar af því.
Hvað þýða úrslitin?
KA menn lyfta sér úr 10. sætinu og upp í 7. sætið með sigrinum. Þeir eru með 22 stig og fara næst í Mosfellsbæinn þar sem að þeir mæta Aftureldingu. ÍBV eru sæti neðar en KA og með stigi minna. Þeir fá Valsmenn í heimsókn í næstu umferð.
Vondur dagur
Það er hægt að nefna sóknarmenn beggja liða, en þá kannski bara fyrir það hvernig færin fóru forgörðum - af því að enginn þeirra átti slæman leik að öðru leyti. Leikurinn hefði getað farið 4-4, en það var látið eitt mark duga í dag.
Dómarinn - 7
Fínn leikur að mestu leyti hjá Sigurði.