Fyrsti sigur heimamanna síðan 5. júlí. Kærkominn sigur fyrir þá en að sama skapi högg fyrir Val. Þeir geta þó huggað sig við það að halda toppsætinu.

Takk fyrir samfylgdina.

Framarar virðast ætla að sigla þessu heim!

Freyr Sigurðsson neglir boltanum í hendina á Sigurði Agli og Gunnar Oddur dæmir á punktinn!

Valsmenn sækja ansi hratt og í þetta skiptið á Lundemo skot en það fer yfir markið!

Valsmenn þeytast nú upp og nú er það Tryggvi Hrafn en hann gefur boltann út í teiginn á Kristinn Frey sem nær góðu skoti en Viktor Freyr ver meistaralega!

Tibbling með frábæra fyrirgjöf inn á teiginn á Fred en hann ákveður að negla í fyrsta og yfir markið!

Leikurinn er farinn af stað aftur.

Kennie Chopart liggur eftir í teig Framara en hann fær aðhlynningu.

Israel Garcia vinnur boltann fyrir utan D-bogann og lætur vaða á markið. Stefan þurfti aðeins að hafa fyrir þessum.

Skoglund neglir boltanum í andlitið á Haraldi Einari sem liggur eftir og fær aðhlynningu. Óviljaverk.

Þá eru áhorfendatölur komnar í hús hér á Lambhagavellinum í kvöld en það eru 723 áhorfendur á vellinum.

Leikurinn er ansi rólegur þessa stundina.

Haraldur Einar fellur við í teig Vals eftir samskipti við Orra Sigurð. Framarar kalla eftir víti. Gunnar Oddur gefur lítið fyrir það.

Valsarar liggja á gestunum þessa stundina og sækja nú horn.

Þá er þetta farið af stað aftur!

Þá er nokkuð skemmtilegum fyrri hálfleik lokið. Gestirnir leiða!

Valsmenn með hættulega in-swing hornspyrnu á teiginn en Lundemo skallar rétt yfir!

Tryggvi Hrafn sleppur nú einn í gegn á móti Viktori Frey og er eltur af Kennie en flaggið fer á loft. Í kjölfarið ýtir Kennie aðeins við Tryggva.

Það er hiti í þessu. Nú sækir Fred aukaspyrnu og Hólmar Örn er allt annað en sáttur.

Adam Páls og Kennie Chopart lenda í stimpingum út á miðjum velli. Gunnar Oddur leyfir leiknum að halda áfram.

Framarar eiga tvo skot inn í vítateig en Lundemo hendir sér fyrir þau bæði og setur hausinn í seinna skotið.

Tryggvi Hrafn gerir vel og keyrir upp hægri kantinn og gefur hann svo út í teiginn á Albin Skoglund en hann hittir ekki boltann. Verður að gera betur þarna.

Framarar negla boltanum langt upp á völlinn, þar sem að Fred er í kapphlaupi við Hólmar Örn en það endar með Fred á jörðinni inn í vítateig. Þrátt fyrir köll úr stúkunni, fá heimamenn ekkert fyrir sinn snúð.

Valsmenn sækja sér aukaspyrnu af svipuðu færi og Dominik Szoboszlai þegar hann skoraði áðan í leiknum gegn Arsenal.

Þessi leikur hefur byrjað af nokkrum krafti og bæði lið að sækja hratt upp en Framarar hafa verið líklegri aðilinn.

Simon Tibbling með góðan bolta inn á teiginn en boltinn rétt svífur yfir hausinn á Róberti Haukssyni. Þessi hefði að öllum líkindum endað í markinu.

Haraldur Einar teiknar góða hornspyrnu inn á teiginn beint á ennið á Kennie Chopart en hann skallar knöttinn rétt yfir markið!

Leikurinn er farinn af stað á ný. Stefán heldur leik áfram.

Stefán Þór liggur eftir og þarf aðhlynningu eftir samstuð. En eins og flestir vita, þá er Frederik Schram, aðalmarkvörður liðsins, meiddur.

Gunnar Oddur flautar þetta í gang! Það eru heimamenn sem byrja þetta.

Valtýr Björn eða Valtarinn eins og hann er oft kallaður er að kynna inn liðin.

Framarar eru bandbrjálaðir eftir slakt gengi upp á síðkastið og þeirra helstu “óvinir” eru Valsarar, kjörið tækifæri til að koma sér aftur í gang og enda í efri hlutanum fyrir skiptingu. Það er 3.60 á Epic á Fram á salatinu sem er skemmtilegt veðmál og gæti vel dottið.

Þorri Stefán kemur inn í byrjunarliðið hjá Fram en Jakob Byström dettur út frá síðasta leik. Gleðifréttir fyrir Fram eru einnig þær að Vuk Oskar er mættur aftur eftir meiðsli og situr á bekknum í kvöld.

Srdjan Tufegdzic, þjálfari Vals, gerir hins vegar engar breytingar frá síðasta leik.

Valur lagði Aftureldingu af velli í síðustu umferð í sannkölluðum endurkomusigri. Þeir eru á toppi deildarinnar en Víkingar fylgja fast á eftir og eru aðeins tvö stig sem skilja liðin að. Með sigri halda þeir forskotinu og kæmu sér upp í 43 stig.

Framarar hafa verið í miklu basli frá því að þeir duttu út fyrir bikarmeisturum Vestra þann 12. júlí en frá 17. júlí hafa þeir ekki unnið leik í deild. Þeir hafa tapað seinustu þremur leikjum og munu væntanlega mæta sterkari til leiks í kvöld!

Verið hjartanlega velkomin í þráðbeina textalýsingu frá Lambhagavellinum, þar sem Framarar munu mæta Val.