Jóhann Ingi flautar til leiksloka, 1-0 lokatölur í mjög svo fjörugum leik þrátt fyrir að einungis eitt mark hafi verið skorað.

Viðtöl og skýrsla væntanleg.

Fær skoppandi bolta í teignum, ætlar sér að setja boltann framhjá Antoni Ara en hann nær hendi á boltann og varnarmenn Blika hreinsa frá!

Fáum við dramatík?

Skagamenn fá aukaspyrnu í fyrirgjafastöðu. Jón Gísli kemur með slakan bolta sem er skallaður frá af fyrsta varnarmanni.

1587 manns á vellinum, toppmæting!

Nýbúinn að fá gult spjald og brýtur af sér á miðjum velli. Blikar kalla eftir rauða spjaldinu en hann sleppur með tiltal. Að mínu mati rétt að hlífa Markúsi.

Þvílíkt skot!

Haukur Andri lætur vaða rétt fyrir utan teig og boltinn í þverslána, þarna munaði litlu.

Viktor Jóns með hnitmiðaðan skalla sem Ásgeir Helgi kemst fyrir.

Xg moli í boði Opta.

Breiðablik - ÍA
1.47 Xg - 1.21 Xg

Viktor Karl með þrumuskot sem fer framhjá marki Skagamanna.

Viktor Jónsson með tilraun sem fer af varnarmanni og yfir mark Breiðabliks.

Gísli sleppur í gegn, klobbar Ásgeir Helga og tekur skotið en Anton Ari ver frábærlega. Gísli hársbreidd frá því að skora gegn gömlu félögunum.

Það varð allt vitlaust undir lok fyrri hálfleiks. Valgeir Valgeirsson og Lárus Orri létu einhver orð falla við hvorn annan og Valgeir sakaði Lárus um að kalla sig tussu. Við það skarst Ólafur Ingi Skúlason, þjálfari Blika, inn í leikinn og lét Lárus heyra það.

Báðir þjálfarar fengu gult spjald að launum, sem og Rúnar Már Sigurjónsson, sem er meiddur, og er í liðsstjórn ÍA.

Hafliði Breiðfjörð er á vellinum og fangaði myndir af stympingunum.

Blikar fá hornspyrnu, en Árni Marinó grípur boltann.

-auglýsing



Hálfleikur og þá er við hæfi að kynna sér framboð Framsóknar í Kópavogi en oddviti listans, Orri Hlöðversson, var á sínum tíma formaður bæði aðalstjórnar Breiðabliks og knattspyrnudeildar félagsins. Hér er áhugaverð grein um uppbyggingu íþróttamannvirkja í Kópavogi.

Framsókn

Jóhann Ingi búinn að sjá nóg og flautar til hálfleiks skömmu eftir stympingarnar. Breiðablik leiðir eftir mark Höskuldar Gunnlaugssonar úr vítaspyrnu.

Fjórum mínútum bætt við.

Skagamenn fá aukaspyrnu rétt fyrir utan D-boga. Gummi Tóta lætur vaða en boltinn beint í varnarvegg Breiðabliks.

Johannes Vall með fyrirgjöf á Ómar sem fellur við en nær einhvern veginn skoti sem fer í stöngina. Þaðan fer boltinn út í teiginn en Blikar hreinsa.

Þá kemur fyrirgjöf frá hinum kantinum og Markús Páll á skalla sem fer rétt yfir mark Blika.

Boltinn í hendina á Viktori Jónssyni í teignum eftir hornspyrnu Blika. Hárréttur dómur við fyrstu sýn.

**
Eftir að hafa séð endursýningu á atvikinu þá fer boiltinn í lærið á Viktori og þaðan í hendina á honum, samkvæmt reglubókinni er það ekki vítaspyrna.

Ágúst Orri leikur listir sínar og sækir hornspyrnu.

Blikar fá hornspyrnu, Óli Valur tekur. Boltinn yfir pakkann og aftur fyrir endalínu.

Gummi Tóta liggur niðri í teig Skagamanna og fær aðhlynningu. Á meðan nýta bæði lið sér gluggann og funda með þjálfurunum.

Gísli Eyjólfs með gott skot sem Anton Ari ver í hornspyrnu. Ekkert kemur úr hornspyrnu Skagamanna.

Lárus Orri að vinna með áhugaverða múnderingu. Svartir Nike Air Max skór, víðar Carrhartt buxur, svört hettupeysa með gylltu letri á og svört húfa við, leyfir lokkunum aðeins að dansa. Dean Martin er að vana í stuttbuxum.

Markús Páll fær boltann óvænt í teig Blika og klárar vel en er réttilega flaggaður rangstæður.

Óli Valur með glæsilegan sprett, kominn í góða stöðu en tekur afleitt skot sem fer hátt yfir mark gestanna.

Blikar keyra hratt upp, Ágúst Orri með góða sendingu á Óla Val sem tekur þunga snertingu og Skagamenn bægja hættunni frá.

Blikar halda betur í boltann en Skagamenn þéttir. Hægara sagt en gert að brjóta þá á bak aftur.

Nú fær Breiðablik hornspyrnu. Óli Valur tekur, Ívar Örn með skottilraun sem fer langt framhjá marki Skagamanna.

Skagamenn fá fyrstu hornspyrnu leiksins. Gummi Tóta tekur en Ívar Örn skallar frá.

Breiðablik; 4-3-3
Anton Ari (m)
Valgeir - Ásgeir Helgi - Ívar Örn - Davíð Ingvars
Viktor Karl - Höskuldur (f) - Andri Rafn
Ágúst Orri - Kristófer Ingi - Óli Valur

ÍA; 4-4-2
Markús Páll - Viktor Jóns (f)
Haukur - Gummi Tóta - Gísli Eyjólfs - Ómar Björn
Vall - Böðvar - Baldvin - Jón Gísli
Árni Marinó (m)

Blikar byrja gegn sólu og leika í átt að Fífunni.

Leikmenn ganga til vallar og uppskera mikið lófatak frá áhorfendum. Biðin styttist!

Breiðablik vs ÍA
Afar erfiður leikur að spá í fyrir fram en eitthvað segir mér að bæði lið skori hér í dag og það fleiri en 1. Því tökum við að bæði lið skora 2 mörk eða fleiri í blíðunni á Kópavogsvelli og fáum 3.15 í stuðul á það hjá Epic.https://t.co/OGHcG0eY6R

— Kristalkúlan (@kristalkulan) April 17, 2026

Hálftími í leik, Óli Skúla búinn að fara yfir byrjunarliðið með stuðningsmönnum og fólk farið að velja sér sæti í stúkunni.

Ólafur Ingi Skúlason, þjálfari Breiðabliks, gerir eina breytingu á liði sínu frá 1-1 jafntefli gegn Víkingi fyrir viku síðan. Þá stilltu Blikar upp í þriggja manna hafsentalínu en nú stilla þeir upp í fjögurra manna vörn með Ásgeir Helga og Ívar Örn í hafsentum.

Viktor Örn Margeirsson tekur sér sæti á bekknum og í hans stað kemur Viktor Karl Einarsson.

Lárus Orri Sigurðsson, þjálfari ÍA, gerir sömuleiðis eina breytingu á byrjunarliði sínu frá 3-3 jafntefli gegn Fram í fyrstu umferð.

Inn í liðið kemur Ómar Björn Stefánsson á kostnað Gísla Laxdal Unnarssonar sem tekur sér sæti á bekknum.

Þeir Rúnar Már Sigurjónsson og Steinar Þorsteinsson eru báðir utan hóps vegna smávægilegra meiðsla. Þeir voru jafnframt utan hóps gegn Fram síðastliðinn sunnudag.

Steinar Þorsteinsson og Rúnar Már Sigurjónsson voru utan hóps gegn Fram í síðustu umferð. Lárus Orri Sigurðsson, þjálfari ÍA, sagði í viðtali eftir leik þá hafa verið að glíma við smávægileg meiðsli. Spurning hvort að þeir geta verið til taks í dag.

„Rúnar rétt missir af þessum leik, ég á alveg eins von á honum í næsta leik. Við verðum að sjá hvernig vikan verður.“

Þá styttist í endurkomu norska hafsentsins Erik Tobias Sandberg. Hann hefur verið frá í átta mánuði vegna taugavanda í annarri hendinni. Lárus Orri bjóst við að þrjár til fjórar vikur væru í þann norska.

Leikirnir eru að sjálfsögðu allir í beinni textalýsingu hér á Fótbolta.net.

16:30 Valur-ÍBV (N1-völlurinn Hlíðarenda)
17:30 KR-Þór (Meistaravellir)
17:30 KA-Víkingur R. (Greifavöllurinn)
18:00 Fram-Keflavík (Lambhagavöllurinn)
18:00 Breiðablik-ÍA (Kópavogsvöllur)
20:00 Stjarnan-FH (Samsungvöllurinn)

Nýjasti brekkusöngvari þjóðarinnar, Ágúst Þór Brynjarsson, spáir fjörugum leik á Kópavogsvelli.

Breiðablik 3 - 3 ÍA
Í minningunni er einhvern veginn alltaf fjör og læti þegar Skagamenn mæta í Smárann, mikið af mörkum og sennilega einhver hiti, eina sem ég veit er að Davíð Ingvars er að fara setja hann í þessum leik.

Gísli Eyjólfsson snýr aftur á Kópavogsvöll í kvöld eftir rúmlega tveggja ára fjarveru eftir veru í Svíþjóð þar sem hann var keyptur til Halmstads frá Breiðabliki.

Gísli snýr á völlinn sem leikmaður ÍA en hann samdi á Skaganum fyrir áramót. Það hefur verið mikið rætt og ritað um að Breiðablik hafi ekki lagt kapp á að fá Gísla aftur heim.

„Mér líst vel á að fá Gísla á Kópavogsvöll. Við þurfum að leggja allt kapp á að stoppa hann, náttúrulega ótrúlega góður leikmaður og við þekkjum hann vel. Við þurfum að stoppa þá alla, en það verður gaman að mæta Gísla," sagði Anton Ari Einarsson, markvörður Breiðabliks í viðtali eftir leikinn gegn Víkingi í fyrstu umferð.

Markús Páll Ellertsson stimplaði sig rækilega inn í Bestu deildina og skoraði tvö mörk í 3-3 jafntefli ÍA gegn Fram í Úlfarsárdalnum síðastliðinn sunnudag. Viktor Jónsson kom sér jafnframt á blað fyrir Skagamenn.

Breiðablik heimsótti Víkinga í opnunarleik Bestu deildarinnar fyrir sléttri viku síðan. Kristófer Ingi Kristinsson skoraði mark Breiðabliks snemma leiks. Gylfi Þór Sigurðsson jafnaði metin um miðbik síðari hálfleiks. Fleiri urðu mörkin ekki og enduðu leikar 1-1.

Heilir og sælir lesendur góðir, verið velkomin í þráðbeina textalýsingu frá Kópavogsvelli þar sem Breiðablik mætir ÍA í 2. umferð Bestu deildarinnar.


föstudagur 17. apríl
16:30 Valur-ÍBV (N1-völlurinn Hlíðarenda)
17:30 KR-Þór (Meistaravellir)
17:30 KA-Víkingur R. (Greifavöllurinn)
18:00 Fram-Keflavík (Lambhagavöllurinn)
18:00 Breiðablik-ÍA (Kópavogsvöllur)
20:00 Stjarnan-FH (Samsungvöllurinn)