Hvernig Skagamenn skoruðu ekki mark er mér hulin ráðgáta. Skot í slá, stöng, risastórar vörslur frá Antoni Ara og fengu ekki vítaspyrnu þó að boltinn hafi farið í hendina á Höskuldi Gunnlaugssyni. Blikar ollu mér vonbrigðum. Þeir voru þokkalegir í fyrri hálfleik en ekki meira en það. Í seinni hálfleik voru Skagamenn með yfirhöndina en nýttu færin illa. Eina skot Blika á markið dugði til í dag.

Það ætlaði allt um koll að keyra undir lok fyrri hálfleiks. Valgeir Valgeirsson og Lárus Orri létu einhver orð falla við hvorn annan og samkvæmt sjónarvotti sakaði Valgeir Lárus Orra um að kalla sig tussu. „Kallaðiru mig fokking tussu?“ Heyrðist uppi í stúku. Við það fauk í Ólaf Inga Skúlason, þjálfara Blika, sem skarst í leikinn og lét Lárus heyra það. Þá fóru þó nokkur orð á milli manna og enduðu þjálfararnir með að fá báðir gult spjald. Í hálfleik voru þjálfararnir tveir og fyrirliðarnir báðir teknir á sitthvoran fundinn með Jóhanni Inga dómara.

Blikar sóttu sinn fyrsta sigur og eru með fjögur stig eftir fyrstu tvær umferðirnar. Skagamenn eru án sigurs, með eitt stig eftir fyrstu tvo leikina.

Gísli Eyjólfsson fór illa með færi sín og veit það best sjálfur. Hann var langt frá því að vera slakur í leiknum, þrátt fyrir að færanýtingin hafi verið það.

Vítadómur Breiðabliks er einfaldlega rangur. Boltinn fer í lærið á Viktori Jónssyni og þaðan í hendina. Samkvæmt reglubókinni er það ekki vítaspyrna. Það sem svíður kannski mest fyrir Skagamenn er að fá ekki vítaspyrnu er boltinn fór í hendina á Höskuldi Gunnlaugssyni í teig Blika. Mistök sem reyndist Skagamönnum dýr. Þá fannst mér línan jafnframt skrítin heilt yfir. Annars hef ég lítið út að setja hvernig dómararnir höndluðu hitann í boðvanginum enda ófær til að dæma um það þar sem ég heyrði lítið uppi í blaðamannaboxi. Fyrir ítarlegri greiningu á frammistöðu dómarakvartettsins í dag þá mæli ég með viðtalinu við Lárus Orra sem birtist eftir leik.