SKÝRSLAN: Þægilegt í Árbænum
Hvað réði úrslitum?
Föst leikatriði. Fylkismenn skora seinni tvö mörkin úr föstum leikatriðum og fyrsta markið kom eftir góða fyrirgjöf.
Bestu leikmenn
1. Guðmundur Tyrfingsson - Fylkir
Var sífellt ógnandi, kom sér ítrekað í góðar stöður og skoraði tvö góð mörk.
2. Guðfinnur Þór Leósson - Fylkir
Það eru ansi margir sem koma til greina hér enda spilaði Fylkisliðið ansi heilsteyptan leik í dag. Ég set þetta á Guðfinn því hann skorar gott mark ásamt því að standa vaktina án þess að stíga feilspor í 90 mínútur.
Atvikið
Annað mark Fylkis. Þegar þeir komust í tveggja marka forustu þá var þetta komið hjá Fylkismönnum.
Hvað þýða úrslitin?
Fylkismenn sigra sinn þriðja leik í röð og festa sig í sessi á toppi deildarinnar eftir sex umferðir. Leiknismenn eru í 10. sæti, tveimur stigum frá fallsæti.
Vondur dagur
Sóknarmenn Leiknis. Komust lítt áleiðis gegn vörn Fylkis allan leikinn og ógnuðu lítið í dag.
Dómarinn - 6
Þokkalegasti leikur hjá Twana, leyfði leiknum að fljóta vel en þó var mögulega brotið á Ólafi markverði Leiknis bæði í öðru og þriðja marki Fylkis. Ég sá þau atvik ekki nógu vel svo tríóið nýtur vafans.