SKÝRSLAN: KR í stuði í fyrsta leik Eiðs Smára hjá KA
Hvað réði úrslitum?
KR-ingar mættu sterkir til leiks eins og svo oft áður. Aron Sigurðarson með tvennu snemma leiks. KA tókst að vinna sig aftur inn í leikinn en Aron fullkomnaði þrennuna og Siggi Breki sýndi frábæra takta og var með þrjár stoðsendingar. KR-ingar hefðu hæglega getað skorað fleiri.
Bestu leikmenn
1. Aron Sigurðarson
Skorar þrennu á 28 mínútum. Var frábær í leiknum og í svakalegum gír í fyrri hálfleik. Hann nálgast markametið.
2. Sigurður Breki Kárason
Sigurður Breki nýtti tækifærið svo sannarlega. Þrjár stoðsendingar og var mjög sterkur í spili KR-inga. Galdur Guðmundsson átti einnig mjög flottan leik.
Atvikið
Fjórða mark KR gerði svo gott sem út um leikinn og það var líka glæsilegt mark. Aron og Galdur fóru illa með vörn KA. Siggi Breki fékk síðan boltann og hælaði hann á Orra sem skoraði. Þá var þetta fyrsti leikur Eiðs Smára í þjálfarateymi KA, kannski ekki draumabyrjun en hann mun eflaust gefa liðinu mikinn kraft.
Hvað þýða úrslitin?
KR er í 2. sæti átta stigum á eftir Víkingi sem er að vinna Val þegar þetta er skrifað. Liðið er þremur stigum á undan Fram sem á leik til góða. KA er áfram í fallsæti, stigi frá öruggu sæti, þegar tvær umferðir eru eftir fyrir tvískiptinguna.
Vondur dagur
Ívar Arnbro Þórhallsson nagar sig líklega í handabökin yfir marki númer tvö. Það var hins vegar allt í molum þar, Aron fékk allan tímann í heiminum til að skalla boltann í netið eftir horn. Varnarleikur KA mjög linur heilt yfir í dag.
Dómarinn - 7
Var einhver dómari? Eru það ekki jákvæð ummæli? Lét leikinn flæða vel og sá ekki þörf á því að lyfta spjaldi á loft sem ég get tekið undir.