Guðmundur flautar til leiksloka.

Afskaplega sannfærandi heimasigur staðreynd hérna í Laugardalnum.

Viðtöl og skýrsla koma inn á eftir.

Stjarnan fær hornspyrnu en Þróttur nær að hreinsa frá.

Þróttur fær hornspyrnu.

Stjarnan fær hornspyrnu. Það kemur hættulegur skalli á fjærstöng þar sem Stjörnukonur gera sig líklega til að pota boltanum yfir línuna en heimakonur ná að bjarga á línu.

Snædís María fékk aðhlynningu og þarf nú að fylgjast með frá hliðarlínunni í mínútu.

Aftur er Snædís María að ógna með hraða sínum. Sæunn nær að stöðva för hennar með frábærri tæklingu en Snædís María liggur eftir.

Hættuleg sendingin inn fyrir vörn Þróttara en Mollee Swift er snögg út úr markinu og handsamar boltann áður en Snædís María nær til hans.

Snædís María er kominn í gott færi en Mollee Swift æðir út úr markinu og lokar á skot hennar.

Báðir þjálfarar gera þrefalda skiptingu!

Guðmundur flautar til hálfleiks. Þróttur hefur verið betra liðið allan fyrri hálfleikinn og leiðir sanngjarnt. Tökum okkur korter.

Katie Cousins í hættulegri stöðu en nær ekki krafti í skot sitt.

Erika Ýr keyrir í bakið á Þróttara, Guðmundur dómari talar aðeins við hana. Erika verður að fara varlega, hún er á spjaldi.

Darraðardans inn í teig Stjörnunnar eftir hornspyrnu. Heimakonur ekki langt frá því að bæta við þriðja markinu.

Þróttur fær hornspyrnu, Sæunn gerir sig líklega til að koma með enn einn baneitraða boltann inn í teig Stjörnunnar.

Unnur Dóra með misheppnaða skottilraun.

Unnur Dóra með góðan bolta inn á hættusvæðið en þar vantaði Þróttara til þess að reka smiðshöggið.

Þróttur fær hornspyrnu, heimakonur hafa verið sterkari aðilinn þessar fyrstu mínútur.

Sæunn með hornspyrnu sem ratar á pönnuna á Kaylu, hún nær ekki stýra skallanum á markið.

Kayla Rollins í góðu færi.

Fær sendingu frá Bríeti og er ein og óvölduð í teig Stjörnunnar. Skot hennar fer hins vegar hátt yfir markið.

Það eru heimakonur sem byrja.

Jóhann Kristinn Gunnarsson, þjálfari Þróttar, gerir þrjár breytingar frá síðasta leik. Mollee Swift verður aftur á milli stanganna eftir bekkjarsetu gegn ÍBV. Ninna Björk Þorsteinsdóttir fær sér sæti á bekknum. Þá koma Rósey Björgvinsdóttir og Kayla Rollins inn í liðið á kostnað Jelenu Tinnu Kujundzic og Þórdísar Nönnu Ágústsdóttur.

Óskar Smári Haraldsson, þjálfari Stjörnunnar, gerir tvær breytingar frá tapinu gegn FH. Rósa María Sigurðardóttir og Vigdís Edda Friðriksdóttir koma inn í liðið. Ingibjörg Lúcía Ragnarsdóttir og Viktoría Skarphéðinsdóttir tylla sér á bekkinn.

John Andrews kom KR upp í Bestu deildina núna í haust og fékk það verkefni að spá í leiki umferðarinnar.

Þróttur R. 0 -0 Stjarnan
Bæði lið gefa ungum leikmönnum mikið pláss og leyfa fleiri leikmönnum að fá mínútur. Liðin halda svo hvort öðru í skefjum og skilja jöfn. (Fylgist svo með þessu enda 5-5 eftir 20 mínútur, haha).

Þróttur tapaði gegn ÍBV í Vestmannaeyjum í síðustu umferð. Fyrir þann leik fagnaði liðið fyrsta stóra titli í sögu knattspyrnudeildar Þróttar þegar liðið lagði Grindavík/Njarðvík í úrslitum Mjólkurbikarsins.

Stjarnan tapaði 1-0 gegn FH í síðasta leik. Frammistaða liðsins var fín og sigurmark Hafnfirðinga kom á lokamínútu leiksins. Óskar Smári, þjálfari Stjörnunnar, sagðist eftir leik hafa fengið leyfi frá sínum leikmönnum til að fara í tilraunastarfsemi í einhverjum leikjum úrslitakeppninnar. Leikurinn gegn FH var slíkur og það er spurning hvort Óskar prófi eitthvað nýtt í dag.

Staðan er sú að liðin hafa að litlu að keppa í dag. Besta deild kvenna er þannig uppsett að eftir 18 umferðir skiptist deildin í tvennt. Sex efstu liðin leika í efri hlutanum en fjögur neðstu í þeim neðri.

Liðin tvö eru í efri hlutanum en þegar fjórar umferðir eru eftir eru þau 14 og 17 stigum á eftir FH, sem situr í öðru sæti. Toppliðið Breiðablik og FH hafa þegar tryggt sér þau tvö Evrópusæti sem eru í boði og því verður einungis leikið upp á stoltið í dag.

Guðmundur Páll Friðbertsson er flautuleikari dagsins. Honum til aðstoðar eru þeir Guðni Freyr Ingvason og Ragnar Arelíus Sveinsson. Fjórði dómari er Ronnarong Wongmahadthai og eftirlitsmaður KSÍ er Jóhann Gunnarsson.

Heil og sæl og öllsömul og verið þið hjartanlega velkomin á Pepsi völlinn í Laugardalnum. Hér munu Þróttur og Stjarnan mætast í efri hluta Bestu deildarinnar.