Fylkir tók á móti Þrótti í 8. umferð Lengjudeildar karla, leiknum lauk með 1-3 sigri Þróttar. Fótbolti.net var á staðnum og ræddi við Heimi Guðjónsson, þjálfara Fylkis, eftir leikinn.
Lestu um leikinn: Fylkir 1 - 3 Þróttur R.
„Mér fannst Þróttararnir betri en við í dag. Það var jafnræði með þessu í fyrri hálfleik og við áttum kafla í lok fyrri hálfleiks en svo komum við bara steinsofandi út í seinni hálfleikinn og þeir gengu á lagið. Svo kom smá líf síðasta korterið og við skoruðum eitt mark en heilt yfir sanngjarn sigur Þróttara.''
Sóknarleikur Fylkis var heldur dapur framan af leik en varð aðeins líflegri eftir skiptingar eftir klukkutíma leik. Hvað vantaði helst upp á?
„Það vantaði hreyfingu, við vorum að taka of margar snertingar á boltann og þetta gekk ekki nógu hratt. Í þessi fáu skipti sem við létum boltann ganga hratt og vorum að skipta honum á milli vængja þá komu möguleikar á opnunum.''
Tvö mörk í síðari hálfleiknum koma Fylki í mjög vonda stöðu og var það erfitt að ætla að fara að koma til baka þá.
„Í síðustu tveimur leikjum erum við búnir að fá á okkur átta mörk og mikið af þeim hafa verið mörk í ódýrari kantinum þar sem menn eru einfaldlega ekki að vinna grunnvinnuna og ekki að dekka mennina sína. Svo töpum við allt of mikið af einvígjum í þessum leik og við þurfum að finna lausnir og fara í grunninn.''
Viðtalið í heild sinni má sjá í spilaranum að ofan.
