Íhugar að leggja hanskana á hilluna

Um síðustu helgi fór Owono af miklum krafti út úr marki sínu og lenti harkalega á De Miguel í leik Andorra og Tenerife, með þeim afleiðingum að De Miguel fékk hné markvarðarins í brjóstkassann.

Hann lá sárkvalinn á vellinum áður en hann fór í hjartastopp og lést síðar á sjúkrahúsi.

Owono varð fyrir gríðarlegu áreiti á samfélagsmiðlum í kjölfar harmleiksins og ákvað að lokum að loka öllum reikningum sínum. Andorra FC sendi jafnframt frá sér yfirlýsingu þar sem fram kom að markvörðurinn væri að ganga í gegnum erfiðustu daga lífs síns.

Þá hefur verið greint frá því að Owono hafi ekki yfirgefið heimili sitt síðan atvikið átti sér stað og hafi hafnað því að spila með landsliði Miðbaugs-Gíneu í komandi landsliðsverkefni.

Samkvæmt spænskum fjölmiðlum á Owono nú erfitt með að sjá fyrir sér framtíð í fótbolta og íhugar alvarlega að leggja hanskana á hilluna.

„Það virðist engu máli skipta hversu mikið fólk reynir að hugga hann. Þetta hefur reynst honum ótrúlega erfitt og haft gríðarleg áhrif á hann, sérstaklega þegar hann hugsar til ekkju Jesus De Miguel og eins og hálfs árs sonar þeirra. Owono veit einfaldlega ekki hvernig hann á að takast á við þetta,“ sagði Ana Maye, sem starfaði áður hjá fótboltasambandi Miðbaugs-Gíneu og er náin Owono.