Markvörðurinn Sindri Kristinn Ólafsson er mættur aftur heim í Keflavík frá FH.
Sindri Kristinn er 28 ára gamall og stóð á milli stanganna hjá Keflavík sem aðalmarkvörður frá 2017 til 2023, en hann er uppalinn hjá félaginu.
Þá samdi hann við FH og var númer eitt bæði tímabilin sem hann var þar. Mathias Rosenörn gekk í raðir FH í byrjun síðasta mánaðar og var þá ljóst að Sindri yrði númer tvö í röðinni.
FH-ingar greina frá því að félagið hafi náð samkomulagi við Keflavík um félagaskipti hans.
„Í Kaplakrika er mikill kærleikur og þar er gott að vera! Fyrir það tækifæri að fá að spila fyrir FH er ég mjög þakklátur fyrir!“ sagði Sindri á Facebook-síðu sinni.
Sindri á 125 leiki að baki í efstu deild með FH og Keflavík ásamt því að eiga 17 leiki fyrir yngri landslið Íslands.
Hann var einnig orðaður við Val vegna meiðsla Ögmundar Kristinssonar en þá er útlit fyrir að Ásgeir Orri Magnússon sé á förum frá Keflavík og leið í Val.
Ásgeir var aðalmarkvörður Keflavíkur á síðasta tímabili og stóð sig gríðarlega vel en liðið komst alla leið í úrslit Lengjudeildarumspilsins og í 8-liða úrslit Mjólkurbikarsins.
Athugasemdir
