Búlgarar leika með sorgarbönd í kvöld

Tólf létust og 50 slösuðust í fjöldaárekstrum á hraðbraut í suðausturhluta Búlgaríu á þriðjudag. Slysin urðu í mikilli þoku nærri borginni Jambol. Lýst var yfir þjóðarsorg í kjölfarið.

Hristo Botev leikvangurinn í Plovdiv verður ansi tómlegur í kvöld. Hann tekur tæplega 19 þúsund áhorfendur en búlgarskur fótbolti er í djúpum dal og mætingin á heimaleiki búlgarska landsliðsins hefur verið sorglega lítil.

Búið er að selja um 1.000 miða en reiknað er með að heildarfjöldi áhorfenda verði um 3.000. Þar af eru 20-30 Íslendingar.

Ísland er ósigrað á toppi riðilsins og gæti tryggt sér sigur í riðlinum í kvöld en Lúxemborg og Eistland mætast á sama tíma og strákarnir okkar leika gegn Búlgörum. Efsta lið riðilsins mun tryggja sér sæti í B-deildinni en liðið sem endar í öðru sæti mun fara í umspil um að komast upp.