England: Liverpool tapaði á heimavelli - Haaland með tvennu

Fimm leikjum var rétt í þessu að ljúka í ensku úrvalsdeildinni. Nottingham Forest gerði sér lítið fyrir og lagði Liverpool á Anfield og Erling Braut Haaland skoraði tvennu í endurkomusigri Manchester City á heimavelli gegn Brentford.

Það var Callum Hudson-Odoi sem reyndist hetja Forest þegar hann skoraði með frábæru skoti á 72. mínútu eftir undirbúning frá Anthony Elanga. Liverpool var talsvert meira með boltann í leiknum en þrátt fyrir fimmtán tilraunir og sjö skot á markið tókst heimamönnum ekki að koma boltanum í mark gestanna.

Brentford komst yfir strax í byrjun leiks á Etihad leikvanginum en Englandsmeistararnir voru búnir að snúa leiknum um hálftíma síðar. Erling Haaland skoraði bæði mörk City og er kominn með níu mörk í fyrstu fjórum umferðunum. Seinna markið kom eftir stoðsendingu frá Ederson sem er markvörður City. City er eina liðið í deildinni með fullt hús stiga.

Þrír leikir enduðu með jafntefli; markalaust var hjá Brighton og Ipswich, Jean-Philippe Mateta bjargaði stigi fyrir Crystal Palace gegn Leicester og Danny Ings jafnaði fyrir West Ham í lokin gegn Fulham á útivelli.