Úlfur Arnar Jökulsson þjálfari Fjölnis
Fjölnismenn gerðu enga frægðarför til Keflavíkur í dag þar sem liðið mætti heimamönnum í Keflavík en lokatölur urðu 4-0 Keflavík í vil. Þó tapið eitt og sér sé yfirleitt nóg geta Fjölnismenn ennfremur svekkt sig á því að hafa misst af gullnu tækifæri á sæti í Bestu deildinni að ári þar sem topplið ÍBV missteig sig gegn Leikni á sama tíma og gerði aðeins jafntefli.
Sigur í dag hefði því þýtt að Fjölnir hefði endað mótið á toppnum og þar með fengið beint sæti í Bestu deildinni en þarf nú að fara í gegnum umspil þar sem liðið mætir Aftureldingu í undanúrslitum. Úlfur Arnar Jökulsson þjálfari Fjölnis var til viðtals að leik loknum.
Sigur í dag hefði því þýtt að Fjölnir hefði endað mótið á toppnum og þar með fengið beint sæti í Bestu deildinni en þarf nú að fara í gegnum umspil þar sem liðið mætir Aftureldingu í undanúrslitum. Úlfur Arnar Jökulsson þjálfari Fjölnis var til viðtals að leik loknum.
Lestu um leikinn: Keflavík 4 - 0 Fjölnir
„Stráir svolítið salti í sárin ég viðurkenni það. 4-0 lítur illa út en gefur að mínu mati ekki rétta mynd af því hvernig leikurinn þróast. Þeir refsa okkur fyrir hver einustu mistök sem við gerum og það segir allt sem segja þarf að í 4-0 sigri sé markmaður valinn maður leiksins.“ Sagði Úlfur um það að nýta ekki tækifærið að stela toppsætinu og þróun leiksins.
Ekki að skoða stöðu í öðrum leikjum
Þegar liðin gengu til búningsherbergja leiddi lið Keflavíkur 1-0. Síðari hálfleikur var ekki gamall þegar Keflvíkingar höfðu tvöfaldað forskot sitt og gert brekkuna brattari fyrir gestina úr Fjölni. Um hvað var rætt í hálfleik og hvort liðið hefði skoðað stöðuna í öðrum leikjum sagði Úlfur.
„Í hálfleik vorum við ekki að skoða stöðuna í öðrum leikjum. Við þurftum að fókusa á okkur sjálfa og töluðum um það skýrt fyrir leik að við þyrftum að halda einbeitingu á okkur og kíkja svo bara á hitt ef við þyrftum eftir leik. Mér fannst við vera í fínni stöðu að vera 1-0 undir í hálfleik þar sem aðstæður voru mjög erfiðar. Við töluðum um að nýta vindinn vel og setja góða pressu á þá en svo byrjum við seinni hálfleikinn skelfilega. Völlurinn er þurr og erfiður og þú getur ekki verið að dútla með boltann inn á miðjunni. Við missum hann mjög klaufalega í byrjun seinni hálfleiks og fáum á okkur mark og það er bara vendipunktur í leiknum finnst mér.“
Ætla sér að gera betur en í fyrra
Fjölnir á þó enn góða möguleika á að vinna sér sæti í Bestu deildinni að ári. Liðið fer nú í umspil þar sem leikið verður að heiman og heima gegn liði Aftureldingar. Hvernig leggst það verkefni í Úlf og hans menn?
„Nú fáum við nokkra daga til að hreinsa hugann eftir mótið sjálft og fara að fókusa á umspilið. Við vitum að hverju við göngum eftir að hafa verið í þessu umspili í fyrra. Núna er klárlega markmiðið að taka fyrst einu skrefi lengra en í fyrra og komast í úrslitaleikinn, og skapa með því þennan skemmtilega aðdraganda og leikdag fyrir okkar stuðningsfólk. Og svo í kjölfarið að klára dæmið.“
Sagði Úlfur en allt viðtalið við hann má sjá í spilaranum hér að ofan.
