![Icelandair](/images/icelandair2_150x150px.png)
„Mér fannst sterkt að koma til baka eftir að hafa lent undir en ég held við getum spilað mun betur en við gerðum í dag. Ég er spennt að koma heim, ég held það verði ennþá betri leikur en í dag," sagði Ólöf Sigríður Kristinsdóttir landsliðsframherji Íslands eftir 1 - 1 jafntefli við Serbíu í umspili um áframhaldandi sæti í Þjóðadeildinni í dag.
Lestu um leikinn: Serbía 1 - 1 Ísland
„Serbar eru með mjög gott lið, þetta eru sterkir einstaklingar og gæði í markinu þeirra en ég held að við séum mun betri en við sýndum í dag."
Olla var á bekknum í dag en kom inná sem varamaður á 69. mínútu.
„Ég er mjög glöð að fá að spila, og er alltaf þakklát fyrir þær mínútur sem ég fæ. Ég er aðallega svekkt að hafa ekki unnið leikinn."
Serbar misstu mann af velli með rautt spjald á 83. mínútu og eftir það virtust hlutirnir falla meira með okkur en ekki nóg.
„Við fengum augnablikið meira með okkur þegar hún fékk rauða spjaldið en mér fannst það hafa verið að byggjast upp. Það var auðvelt að koma inná í þessum leik, Selma hjálpaði mér að koma í réttu stöðurnar og talar mikið við mig. Það var pirrandi og svekkjandi að ná ekki að nýta það að vera manni fleiri."
Athugasemdir