Barcelona gæti farið fram á að El Clasico yrði leikinn aftur

Joan Laporta forseti Barcelona hótar að félagið leiti réttar síns og gæti farið fram á að El Clasico verði spilaður að nýju. Börsungar vilja meina að löglegt mark hafi verið tekið af þeim á 28. mínútu.

Lamine Yamal hélt að hann hefði skorað en eftir langa VAR skoðun var úrskurðað að ekki væri sannað að boltinn hefði farið inn. Á Spáni er ekki notast við marklínutækni.

Laporta hefur farið fram á að fá upptökur og myndir af ákvarðanaferlinu.

„Ef niðurstaðan þegar við höfum rýnt í öll gögnin er sú að mistök hafi verið gerð þá munum við skoða alla möguleika. Ef sannað er að þetta var löglegt mark gætum við farið fram á að leikurinn yrði spilaður að nýju. Það eru fordæmi fyrir því í öðrum leik í Evrópu vegna VAR mistaka," segir Laporta og vísar þar í leik Anderlecht og Genk í Belgíu sem leikinn var að nýju vegna VAR mistaka.

Real Madrid vann leikinn gegn Barcelona á sunnudagskvöld þar sem Jude Bellingham skoraði sigurmark í uppbótartíma. Real Madrid er á toppnum með ellefu stiga forystu á Barcelona.