Kristian mætir funheitur í kanadíska kuldann - „Það besta sem maður gerir“

„Það er mjög kalt hérna en bara skemmtilegt að koma til Kanada, maður hefur aldrei komið hingað áður," segir landsliðsmaðurinn Kristian Hlynsson sem er mættur með íslenska landsliðinu til Toronto þar sem framundan eru vináttulandsleikir gegn Kanada og Haítí.

Kristian segist setja stefnuna á að skora í landsliðstreyjunni í þessum glugga en hann hefur verið funheitur með félagsliði sínu, Twente í Hollandi.

Hann er með fimm mörk og eina stoðsendingu í síðustu sjö deildarleikjum.

„Maður hefur allavega verið að skora í síðustu leikjum og liðið hefur verið að vinna. Það er allt að detta saman, Það er geggjað. Það besta sem maður gerir er að skora í leik og vinna. Við erum á mjög góðu róli í deildinni, segir Kristian.

Hver er ástæðan fyrir því að hann hefur sprungið svona rækilega út síðustu vikur?

„Í byrjun tímabilsins var ég að fá mjög mörg færi en var ekki að klára þau. Ég er núna að klára færin og er að skora, þetta hefur verið að detta."