Fiorentina er komið í úrslit Sambandsdeildar Evrópu eftir 1-1 jafntefli liðsins gegn Club Brugge í Belgíu í kvöld.

Flórensarliðið vann fyrri leikinn 3-2 og þurfti því aðeins að gera jafntefli í kvöld til að komast áfram.

Hans Vanaken, einn besti maður Brugge, skoraði fyrir heimamenn á 20. mínútu leiksins og jafnaði einvígið.

Fiorentina var töluvert betri aðilinn og skaut meðal annars í stöng og slá þegar fimmtán mínútur voru eftir. Það var ekki fyrr en á 82. mínútu er Brandon Mechele braut af sér í teig Brugge sem Fiorentina tókst að loka leiknum.

Lucas Beltran fór á punktinn og skaut Fiorentina áfram í úrslitaleikinn.

Fiorentina mætir Aston Villa eða Olympiakos í úrslitum. Þetta verður annað árið í röð sem Fiorentina spilar til úrslita í þessari keppni.