ÍBV fær norska framherjann Stale Steen Sæthre til sín á reynslu næstkomandi sunnudag. Þetta staðfesti Kristján Guðmundsson, þjálfari liðsins, í samtali við Fótbolta.net í dag.
Stale æfir með ÍBV í næstu viku og spilar með liðinu gegn FH í Fótbolta.net mótinu um aðra helgi.
Stale er 23 ára gamall en hann hóf meistaraflokksferil sinn hjá Stabæk þar sem hann lék þrjá leiki í úrvalsdeildinni.
Síðan þá hefur Stale leikið með Asker, Fyllingsdalen og Førde en síðast var hann hjá Lysekloster í norsku C-deildinni. Stale var markahæsti leikmaður liðsins á síðasta tímabili.
ÍBV hefur leik í Fótbolta.net mótinu á laugardag klukkan 10:00 en liðið mætir þá Breiðabliki í Fífunni. Leikurinn verður sýndur beint á sporttv.is.
Athugasemdir