Real Madrid á möguleika á því að vinna HM félagsliða annað árið í röð eftir nauman sigur á Al Jazira frá Abú Dabí í kvöld.

Real, sem er ríkjandi Spánar- og Evrópumeistari, lenti undir á 41. mínútu þegar Brasilíumaðurinn Romarinho skoraði. Cristiano Ronaldo jafnaði fyrir Madrídinga í upphafi seinni hálfleiks.

Jafnt var á tölum alveg fram á 81. mínútu þegar Walesverjinn Gareth Bale kom boltanum í netið með sinni fyrstu snertingu eftir að hafa komið inn á sem varamaður. Bale hefur verið mikið í meiðslum og markið var kærkomið fyrir hann.

Á sunnudaginn mun Real Madrid spila úrslitaleikinn gegn Gremio frá Brasilíu. Mótið fer fram í Abú Dabí.