Gestir vikunnar í sjónvarpsþætti Fótbolta.net: Óli Stefán Flóventsson, Hjörtur Hjartarson og Baldur Sigurðsson.
Eftir ársþing KSÍ í vikunni hafa kröftugar umræður farið fram um það hvort breyta eigi atkvæðisrétti félaga á þinginu. Viðar Halldórsson, formaður aðalstjórnar FH, sagði meðal annars að félög í neðri deildunum sem hafa ekki yngri flokka eigi ekki að hafa atkvæðisrétt á ársþingi KSÍ.
Sjá einnig:
Vill að ákveðin félög í neðri deildum fái ekki atkvæðisrétt
Lárus: Viðar talar á niðrandi hátt og af töluverðri vanþekkingu
Hagsmunasamtök neðrideildarfélaga senda yfirlýsingu
Málið var til umræðu í sjónvarpsþætti Fótbolta.net en gestir vikunnar þar voru Baldur Sigurðsson, Hjörtur Hjartarson og Óli Stefán Flóventsson.
„Ég sé ekkert að þessu fyrirkomulagi. Mér fannst þetta viðtal við Viðar vera frekar hlægilegt. Þetta er lýðræði og þetta er fyrirkomulag sem hefur verið til staðar," sagði Baldur Sigurðsson, leikmaður Stjörnunnar, en hann var á meðal gesta í þættinum.
„Að sjálfsögðu á 4. deildin að vera með í þessari kosningu. Þú spilar eftir reglunum sem eru í gangi hverju sinni. Allir vissu að svona var atkvæðisskiptingin. Þeirra frambjóðandi tapaði og síðan kemur hann í viðtal, þetta var eins og Sigmundur Davíð eftir landsfund Framsóknarflokksins þegar hann sagði að það hefði komið rútur af mönnum sem hann hefði ekki séð áður. Þetta var svipað. Það vissu allir hvernig reglurnar eru og þú spilar eftir þeim."
Hjörtur og Óli telja að það megi skoða einhverskonar breytingar á reglunum. „Það eiga allir að hafa atkvæðisrétt sem eru inni í KSÍ. Svo er spurning hvort félög sem eru með yngri flokka starf og meistaraflokkslið karla og kvenna eigi að vera með meira vægi. Kannski ættu þau félög að fá fimm atkvæði," sagði Óli Stefán.
„Það er allt í lagi að skoða þetta aðeins. Liðin í efstu deild hafa 48 atkvæði samtals og síðan er restin í deildunum fyrir neðan. Neðri deildarliðin áttuðu sig á því að sameinuð gætu þau haft áhrif og þau höfðu sín áhrif með að Guðni vann. Hann var þeirra frambjóðandi," sagði Hjörtur.
„Á lið, sem er 15-20 strákar, að leika sér í 4. deild, að hafa áhrif á stefnu á KSÍ? Strákar sem hafa engra hagsmuna að gæta og er nánast eins og eitthvað fyrirtækjalið sem hittist í hádeginu í fótbolta. Ég er ekki sammála því að taka af þeim atkvæðisréttinn en mér finnst valid punktur að velta því fyrir sér hvort þeir eigi að hafa svona mikil áhrif," bætti Hjörtur við.
Hér að ofan má horfa á umræðuna í heild sinni.
Athugasemdir