Sjá einnig:
Vill að ákveðin félög í neðri deildum fái ekki atkvæðisrétt
Lárus: Viðar talar á niðrandi hátt og af töluverðri vanþekkingu

Yfirlýsingin frá HSN
Hagsmunasamtök neðrideildar félaga (HSN) vilja koma eftirfarandi á framfæri, vegna orða Viðars Halldórssonar, formanns FH, í útvarpsþættinum Akraborginni í gær, þar sem hann lýsti þeirri skoðun sinni að neðrideildar félög sem ekki hafa barna- og unglingastarf eigi ekki að hafa atkvæðisrétt á ársþingi KSÍ.

Vert er að hafa í hyggju mismunandi stöðu margra þeirra liða sem í neðri deildunum eru, þar sem sum eiga þess kost að bjóða upp á barna- og unglingastarf en önnur ekki. Þau félög sem ekki bjóða slíkt eru í mjög mörgum tilvikum venslafélög annarra eldri félaga, eða stofnuð af eða í kringum leikmenn sem fá ekki tækifæri með uppeldisfélagi sínu en vilja engu að síður halda áfram knattspyrnuiðkun og keppni á vettvangi KSÍ.

Stjórnir þessara félaga, sem og leikmennirnir sjálfir, vinna mjög óeigingjart starf með hagsmuni knattspyrnunnar á Íslandi að leiðarljósi. Þetta fólk er tilbúið að leggja á sig mikla vinnu til að tryggja framgang liða sinna og leikmanna sem þar spila.

Í ljósi þess mikla starfs sem unnið er í neðri deildum á Íslandi af fagfólki sem þar kemur að, var ákveðið að stofna HSN, svo rödd þessara félaga heyrðist betur á vettvangi íslenskrar knattspyrnu, og til að styrkja tengsl þeirra við KSÍ með það að markmiði að bæta knattspyrnuna í landinu. Krafturinn sem býr í neðrideildar félögum er vannýtt auðlind innan KSÍ og mikilvægur hluti áframhaldandi uppbyggingar knattspyrnunnar á Íslandi, ekki síst í hinum dreifðari byggðum. Því væri fásinna að reyna að draga úr vægi þeirra með því að takmarka atkvæðarétt og aðra lýðræðislega þátttöku í starfi knattspyrnuhreyfingarinnar.

Líkt og með allt annað, hvort sem er innan KSÍ eða annarstaðar, er hollt og gott að endurskoða hlutina. Því var ágætt að á nýafstöðnu þingi KSÍ skyldi samþykkt einróma að endurskoða skuli regluverk KSÍ. Mikilvægt er í allri umfjöllun að sýna virðingu gagnvart öllum þeim sem leggja mikla vinnu í íslenska knattspyrnu, og vanda orðaval í slíkri umfjöllun allri. HSN mun hafa slíkt áfram að leiðarljósi og vonast eftir sambærilegri nálgun annarra aðila sem tjá sig um íslenska knattspyrnu.

F.h. Hagsmunasamtaka neðrideildar félaga,
Guðjón Bjarni Hálfdánarson