Einn leikur fór fram í spænsku úrvalsdeildinni í kvöld en það var leikur Valencia og Real Madrid.

Real Madrid átti tvo leiki til góða og var þetta fyrri leikurinn af þeim.

Valencia er í neðri hluta deildarinnar en þeir byrjuðu af miklum krafti í leiknum og eftir 9 mínútna leik var staðan orðin 2-0 fyrir Valencia. Simone Zaza og Fabian Orellana skoruðu mörk heimamanna.

Rétt fyrir lok fyrri hálfleiks tókst Real Madrid að klóra í bakkann en það var Cristiano Ronaldo sem skoraði markið en hann var að leika sinn 700. leik á ferlinum.

Engin mörk voru skoruð í seinni hálfleik og tapaði Real Madrid því mikilvægum stigum í toppbaráttunni. Real er á toppnun, stigi á undan Barcelona.