Tvö úrvalsdeildarlið féllu úr leik í enska deildabikarnum í kvöld.

Tímabilið hefur byrjað mjög illa hjá Rafa Benitez og lærisveinum hans í Newcastle. Þeir hafa tapað tveimur fyrstu leikjum sínum í ensku úrvalsdeildinni og í kvöld töpuðu þeir gegn Nottingham Forest.

Aleksandar Mitrovic kom Newcastle yfir eftir þrjár mínútur í leiknum. Forest, sem er í Championship-deildinni, svaraði með tveimur mörkum áður en hinn efnilegi Rolando Aarons jafnaði aftur.

Staðan var 2-2 eftir venjulegan leiktíma, en í framlengingunni skoraði Tyler Walker sigurmarkið fyrir Nottingham Forest.

Newcastle er úr leik í 2. umferð, rétt eins og Southmapton, sem tapaði 2-0 gegn Wolves. Dýrlingarnir hvíldu nokkra leikmenn og að lokum þurftu þeir að sætta sig við 2-0 tap gegn Úlfunum.

Huddersfield lagði Rotherham eftir að hafa lent undir, Burnley vann Blackburn og West Ham hafði betur gegn Celtenham Town.

Jóhann Berg Guðmundsson kom inn á sem varamaður á 78. mínútu hjá Burnley í kvöld. Jói Berg hefur byrjað fyrstu tvo leiki Burnley í ensku úrvalsdeildinni á þessu tímabili.

Að lokum vann síðan Stoke öruggan 4-0 sigur á Rochdale. Miðjumaðurinn Joe Allen skoraði tvö fyrir Stoke í leiknum, en hin mörkin voru skoruð af Peter Crouch og Ramadan Sobhy.