Sverrir Ingi í sólinni fyrir æfingu í dag
„Það eru skemmtilegir tímar framundan og það er gott að byrja sem fyrst og reyna að vera eins vel undirbúnir og við getum,“ sagði landsliðsmaðurinn Sverrir Ingi Ingason í samtali við Fótbolta.net skömmu áður en hann tók þátt í æfingu með strákunum okkar á Laugardalsvelli fyrr í dag.
Sverrir Ingi er einn af þeim níu leikmönnum sem bættust við íslenska æfingahópinn í dag og er ánægður með að fá góðan undirbúningstíma fyrir HM.
„Nú er stærsti hluti hópsins kominn saman. Það voru nokkrir sem komu inn núna bara í vikunni og svo eigum við náttúrulega tvo heimaleiki hérna þannig að byrjum að undirbúa okkur núna,“ sagði Sverrir meðal annars og bætti við að undirbúningur liðsins væri með hefðbundnu sniði fram að móti.
„Þetta verður með hefðbundnu sniði. Bara eins og við erum vanir að gera þetta. Við vildum náttúrulega vera hérna heima í kringum okkar fjölskyldur og okkar fólk þannig að við erum mjög þakklátir fyrir það og ef veðrið helst svona þá er það enná betra.“
Sverrir Ingi segist taka eftir mikilli stemmningu og eftirvæntingu á meðal Rússa en hann spilar sem kunnugt er með rússneska liðinu Rostov.
„Það er náttúrulega gríðarleg tilhlökkun hjá öllum Rússum. Þeir bíða spenntir eftir þessu og eru mjög stoltir af því að halda þetta mót.“
Nánar er rætt við Sverri Inga í sjónvarpinu hér að ofan.
Athugasemdir
