„Ég er mjög ánægður með hvernig við unnum þennan leik, liðsheildin hjá okkur er svo sterk," segir Hörður Björgvin Magnússon sem í kvöld skoraði sitt fyrsta landsliðsmark þegar hann tryggði Íslandi sigur gegn Írum með aukaspyrnumarki.
Lestu um leikinn: Írland 0 - 1 Ísland
„Ég sá glufu þarna og markvörðurinn þeirra sá varla boltann. Þegar maður stóð yfir boltanum sá maður hann inni. Ég æfi stundum aukaspyrnur aukalega eftir æfingar hjá Bristol og það var sætt að skora svona, hvað þá þegar þjálfarinn er að horfa á mann."
Hörður hefur verið á bekknum að undanförnu hjá Bristol City en knattspyrnustjóri félagsins fylgdist með leiknum í kvöld.
„Ég fékk sms frá honum, vonandi gefur þetta manni eitthvað og maður fær vonandi að spila."
Gylfi Þór Sigurðsson, aukaspyrnusérfræðingur íslenska liðsins, var ekki með í kvöld og því fékk Hörður að spreyta sig.
„Maður hefur lært af þessum mönnum hvernig spyrnutæknin er, þar á meðal hjá Gylfa. Það er gaman að veita honum smá samkeppni," sagði Hörður léttur.
Þó Hörður sé ánægður með markið fagnaði hann því ekki mikið á vellinum sjálfum eftir að hafa skorað. „Ég var ekki búinn að undirbúa neitt fagn. Ég tók bara fyrsta mann sem ég sá, hann var fljótur að mér."
Athugasemdir