„Við lögðum áherslu á að reyna að ná boltanum niður á jörðina og spila hratt. Þegar það tókst þá náðu þeir ekki saman endum og við sköpuðum fín færi."

„Þetta mark sem þeir skora slær okkur útaf laginu en á móti vil ég hrósa liðinu eftir svona langa taphrinu að þá er erfitt að rífa sig upp úr því en það gerðum við svo sannarlega."

„Ég met það sem svo að við unnum það vel á æfingunum fyrir leikinn hvað við vildum gera og ætluðum að gera og það kom hægt og bítandi. Ég sá það eftir jöfnunarmarkið að þá áttuðu menn sig bara á því að við vorum með miklu betra lið." sagði Willum enn fremur

Svo var Willum spurður um hvernig það væri að koma aftur í Vesturbæinn en hann er mikill KR-ingur og stýrði liðinu frá 2002-2004.

„Þetta er bara dásamlegt, ofsalega góð tilfinning að koma hér KR-völlinn, taka sigur og finna stuðinginn því ber að þakka, fólkið gaf liðinu orku og allir voru sáttir við að sigra."

Þá var hann spurður um kröfurnar sem gerðar væru til hans í þjálfarastarfi KR eftir slæma byrjun tímabilsins undir stjórn Bjarna Guðjónssonar.

Alveg örugglega að sigra næsta leik, þannig hefur það alltaf verið hér í Vesturbænum og ég kann ágætlega við það, kröfurnar eru miklar og á þessu afreksstigi fótboltans er krafan alltaf sú sama. Öll vinna og umgjörð snýr að því sama: Það er ekkert gaman að þessu nema þú sigrir!