Mist Rúnarsdóttir @MistRunarsdotti

Textalýsing Skýrslan Viðtöl

Hvað réði úrslitum? Tvö mögnuð knattspyrnulið mættust á Origo-vellinum í kvöld og agaður varnarleikur og einbeittir markmenn áttu sviðsljósið. Leikurinn var heilt yfir jafn og úrslitin hefðu getað dottið hvoru megin sem er. Það féll hinsvegar í hlut Öglu Maríu Albertsdóttur að skora eina markið í frábærum fótboltaleik. Bestu leikmenn 1. Sonný Lára Þráinsdóttir Fyrirliðinn var frábær í marki gestanna. Þurfti nokkrum sínum að taka á honum stóra sínum með góðum vörslum og var þar að auki mjög öflug í að eiga við fyrirgjafir og föst leikatriði Vals. 2. Andrea Rán Snæfeld Þetta var baráttuleikur og Andrea Rán var algjörlega frábær á miðsvæðinu hjá Breiðablik. Hún er ekki fyrirferðarmest á vellinum og fær sjaldnast það hrós sem hún á skilið fyrir sitt vinnuframlag. Hafði nóg að gera í kvöld og leysti sitt hlutverk vel gegn öflugum miðjumönnum Vals. Atvikið Fjórum mínútum áður en Agla María náði forystunni munaði engu að Alexandra Jóhanns skoraði sjálfsmark. Hún átti þá hörkuskalla að eigin marki sem Sonný Lára varði frábærlega.

Hvað þýða úrslitin? Breiðablik skýst í toppsætið og eru svo gott sem orðnar Íslandsmeistarar. Þær eru með tveggja stiga forskot á Val og eiga auk þess leik til góða. Blikar vilja eðlilega ekki tala um að þetta sé komið en það er nákvæmlega ekkert sem bendir til þess að liðið sé að fara að tapa stigum. Breiðablik og Valur hafa verið í algjörum sérflokki í deildinni. Vondur dagur Úrslitin voru algjör vonbrigði fyrir Valsliðið og það leyndi sér ekki í leikslok. Liðið lék vel stærstan part leiksins en það dugði ekki til því andstæðingarnir gerðu það einfaldlega líka. Úrslitin þýða að það þyrfti eitthvað rosalegt (og í raun ómögulegt) að gerast til að Íslandsmeistararnir eigi séns á titli. Liðið er auk þess úr leik í bikarnum svo kvöldið verður vont og morgundagurinn líka. Dómarinn - 8 Mér fannst Þorvaldur mjög góður í kvöld og með sitt á hreinu. Var ekki alveg eins hrifin af aðstoðardómara 1 sem mér fannst stundum taka rangar ákvarðanir. Heilt yfir þó mjög vel dæmdur leikur og jákvætt að sleppa við dómaraumræðuna sem hefur fylgt alltof mörgum deildarleikjum í sumar.