Mist Rúnarsdóttir @MistRunarsdotti

Textalýsing Skýrslan Viðtöl

Hvað réði úrslitum? Kristján Guðmunds lagði leikinn gríðarlega vel upp og framkvæmdin hjá leikmönnum hans var frábær. Stjörnuliðið varðist virkilega vel, lokaði uppáhaldssvæðum Blikanna, og sótti svo beinskeytt þegar bolti vannst. Þar að auki var vinnuframlag og barátta Stjörnunnar til fyrirmyndar. Blikar voru mikið með boltann en gekk illa að skapa sér hættuleg færi og voru svo ekki nógu öruggar til baka þegar á reyndi. Bestu leikmenn 1. Anna María Baldursdóttir Drottningin í Garðabæ var frábær í miðverðinum og stýrði liði sínu af festu úr öftustu línu. Hún vann mikið af boltum og var alltaf mætt í hjálparvörn þegar liðsfélagar þurftu á henni að halda. Kórónaði frábæran leik með stoðsendingu í fyrra marki Stjörnunnar. 2. Arna Dís Arnþórsdóttir Það var nóg að gera hjá hægri bakverðinum sem gerði gríðarlega vel gegn tveimur af bestu leikmönnum deildarinnar, þeim Öglu Maríu og Áslaugu Mundu sem báðar spreyttu sig gegn henni á vinstri væng Breiðabliks á einhverjum tímapunkti í leiknum. Arna Dís hleypti andstæðingum sínum ekki framhjá sér og var lykilleikmaður í öflugum varnarleik Garðbæinga. Atvikið Blikar voru búnar að vera með boltann fyrsta korterið í seinni hálfleik og það virtist aðeins tímaspursmál hvenær þeim tækist að jafna. Þá dúkkaði Katrín nokkur Ásbjörnsdóttir upp, lék inn á vítateig Blika og kom Stjörnunni í 2-0 með frábæru skoti.

Hvað þýða úrslitin? Stjarnan skín skært um þessar mundir og vinnur sinn þriðja deildarleik í röð. Sigurinn lyftir þeim upp í 4. sæti deildarinnar. Blikar tapa hinsvegar öðrum heimaleik sínum í röð og þriðja deildarleiknum í sumar og missa toppsætið til Valskvenna. Vondur dagur Það voru þónokkrir Blikar sem ekki komust í takt við leikinn. Miðjumaðurinn Taylor Marie Ziemer var ein þeirra en dagurinn varð því miður sérstaklega vondur þegar hún þurfti að fara af velli í hálfleik vegna höfuðmeiðsla. Vonandi eru meiðslin ekki alvarleg. Dómarinn - 5 Tríóið tók mjög undarlegar ákvarðanir á köflum og áherslurnar virtust sérstakar. Sem dæmi voru nokkur brot dæmd á Blika þegar þær sóttu stíft undir lokin sem erfitt var að átta sig á. Vil þó gefa dómara leiksins plús fyrir að vera eldsnöggur að stoppa leikinn og kalla inn sjúkraþjálfara þegar leikmenn fengu höfuðhögg.