Sverrir Örn Einarsson @SEinarsson

Textalýsing Skýrslan Viðtöl

Hvað réði úrslitum? Að einhverju leyti má skrifa það á heppni þegar boltinn féll fyrir fætur Tahnai Lauren Annis í teig Keflavíkur eftir fast leikatriði. Máltækið segir þó að fólk skapi sína eigin heppni og það á vel við í dag. Norðankonur unnu vel fyrir stigunum þremur og vörðu mark sitt með kjafti og klóm og hleyptu Keflavíkurliðinu aldrei of nálægt marki sínu. Bestu leikmenn 1. Dominique Jaylin Randle Linli Tu dró sig mikið út á væng í dag og mætti þar Dominique sem varðist fimlega og náði að halda Linli því sem næst alveg niðri. Sterk frammistaða þar á bæ. 2. Hulda Björg Hannesdóttir Svolítið klassískt að velja fyrirliða líka en hún á það skilið. Stýrði liði sínu af röggsemi inn á vellinum og var sívinnandi. Alvöru fyrirliða frammistaða. Atvikið Í leik fárra atvika sem vert er að minnast á er auðvelt að benda á markið sem kom eftir rúmlega hálftíma leik. Vakti líka hjá mér kátínu í blaðamannaboxinu þar sem við sem þar sátum ræddum um hina stórgóðu hljómsveit Depeche Mode að heyra stórvin minn Axel vallarþul spyrja okkur hvað það væri nú. Létti manni lundina í tilþrifalitlum leik.

Hvað þýða úrslitin? Þór/KA lyftir sér upp í þriðja sæti deildarinnar með 19 stig og situr þar fjórum stigum á eftir Val og Breiðablik. Keflavík áfram í sjöunda sæti með ellefu stig. Vondur dagur Hvað skal segja? Keflavíkurkonur lögðu sig allar fram og ekki hægt að saka þær um annað. Það að skapa færi gekk þó illa og eitthvað sem þjálfarateymi liðsins þarf að leggjast yfir á næstu dögum svo þau Glenn og Guðrún Jóna hafa nóg að ræða næstu daga. Dómarinn - 7 Frekar náðugt í dag hjá Helga sem þurfti lítið að hafa sig í frammi. Spurning hvort honum var ekki kalt í vindinum í Kef því leikurinn var afskaplega hægur á köflum.