Guðmundur Aðalsteinn Ásgeirsson @gummi_aa

Textalýsing Skýrslan Viðtöl

Hvað réði úrslitum? Mér fannst Eyjamenn að mörgu leyti sjálfum sér verstir í þessum leik. Klaufamistök í fyrra markinu sem Þróttur skoraði og seinna markið kom eftir fína sókn, en það hefði auðveldlega verið hægt að koma í veg fyrir það. ÍBV náði ekki upp miklum takti í leiknum og Þróttarar unnu taktísku skákina á milli tveggja liða með fimm manna varnarlínu. ÍBV hafði vonast til að fá meira pláss á bak við vörn Þróttar en það gekk ekki þar sem heimamenn voru þéttir fyrir og biðu eftir rétta augnablikinu. Þeir náðu svo að halda út í lokin þegar ÍBV setti pressu sem var vel gert. Þessi fimm manna varnarlína Þróttar er afar sterk. Bestu leikmenn 1. Vilhjálmur Kaldal Sigurðsson (Þróttur R.) Var virkilega öflugur. Vann baráttuna í fyrra marki Þróttar og skoraði svo sjálfur seinna markið af miklu harðfylgi. Leikmaður sem hefur verið að rísa upp í Þróttaraliðinu. 2. Þórhallur Ísak Guðmundsson (Þróttur R.) Var traustur í marki Þróttar og bjargaði meistaralega undir lokin þegar ÍBV hótaði því að jafna metin. Atvikið Ég myndi segja að það sé fyrra markið sem Þróttur skorar. Klaufagangur hjá ÍBV og heimamenn voru grimmir að refsa. Það mark var mjög svo mikilvægt fyrir það hvernig leikurinn spilaðist svo.

Hvað þýða úrslitin? ÍBV er áfram í þriðja sæti með 19 stig, en þeir fjarlægjast toppliði Fjölnis sem lagði Leikni að velli í kvöld. Eyjamenn eru núna átta stigum á eftir Fjölnismönnum. Þróttarar hafa unnið þrjá leiki í röð og eru núna með 15 stig í sjötta sæti. Vondur dagur Sigurður Arnar Magnússon gerði slæm mistök í fyrra marki Þróttar og þau komu á vondum tímapunkti. Oliver Heiðarsson var að spila á sínum gamla heimavelli og hann fékk ekki úr miklu að moða eftir að hafa gert þrennu í fyrri leiknum. Fékk ekki mikið pláss til að hlaupa á bak við vörn Þróttara. Eyjamenn voru klaufar heilt yfir. Dómarinn - 5,5 Það var alveg harka og barátta í þessum leik, en mér fannst Aðalbjörn aðeins of spjaldaglaður. Tiltal nóg í nokkrum tilfellum. Nokkrir skrítnir dómar inn á milli en mér fannst rétt hjá honum - frá mínu sjónarhorni - að dæma ekki víti fyrir ÍBV í lokin.