KR-ingar voru undir í baráttunni í fyrri hálfleik en þær breytingar sem Bjarni Guðjónsson gerði skiluðu svo sannarlega sínu. KR sýndi einfaldlega meiri gæði í seinni hálfleik á meðan FH-ingar misstu hausinn og fóru að einbeita sér að allt öðru en fótboltanum.

Gunnar Jarl dæmdi vítaspyrnu sem KR-ingar jöfnuðu úr. Myndavélarnar náðu atvikinu ekki vel en við þetta rann allt út í sandinn hjá FH. Klárlega atvik leiksins.

KR-ingar eru komnir á toppinn og halda áfram á góðu skriði. FH hefur hinsvegar verið að hiksta verulega og það virðist vera smá skjálfti í Krikanum.

FH-ingar misstu hausinn í seinni hálfleik þegar þeir lentu í mótlæti. Staðreyndin var sú að KR sýndi einfaldlega meiri gæði þegar á hólminn var komið. Margir FH-ingar að leika undir getu en Sam Tillen var manna slakastur, gríðarlega óöruggur.

Leikurinn var gríðarlega erfiður að dæma því leikmenn létu allt mótlæti fara illa í sig og mikil orka fór í tuð. Harkan var mikil og Gunnar var alls ekki í öfundsverðu hlutverki. Gunnar náði ekki að finna sína línu strax og það gerði honum erfitt fyrir í framhaldinu.