Pressan skilaði sér á endanum. FH-ingar vita það vel að leikurinn er ekki búinn fyrr en dómarinn flautar af. Innkoma Steven Lennon af bekknum hafði mjög jákvæð áhrif og liðið ógnaði mun meira eftir hans innkomu.

Það er ekki hægt að velja annað en eina markið í leiknum sem kom á 93. mínútu.

Þrjú gríðarlega mikilvæg stig fyrir FH-inga og það vita þeir enda fögnuðu þeir gríðarlega eftir leik. Sigur sem FH-ingar geta rifjað upp með bros á vör ef þeir landa Íslandsmeistarabikarnum. Leiknismenn eru enn í fallsæti.

Leiknismenn halda áfram að gefa öllum leik en stigasöfnunin gengur mjög hægt. Vonbrigði leik eftir leik en það verður að hrósa leikmönnum liðsins fyrir að halda áfram á fullum krafti þó hlutirnir hafi ekki verið að falla með þeim.

Frábær frammistaða hjá dómaratríóinu. Ívar Orri hefur lent í bröttum brekkum í sumar en þarna sýndi hann hvað hann getur. Alls ekki auðveldur leikur að dæma en hann leysti það með mikilli yfirvegun og sóma.