Fyrri hálfleikurinn var eign Valsmanna og þegar upp var staðið dugði tveggja marka forysta þeirra til að landa þremur stigum gegn Fylkismönnum sem mættu of seint í leikinn. Vel vaknaðir og svangir í stig eftir að hafa virkað saddir í Grafarvoginum í síðustu umferð.

Hermann Hreiðarsson var búinn að vera býsna pirraður lengst af fyrri hálfleik en þegar Valsmenn fengu dæmt víti þá missti hann eilítið einbeitinguna, tók 20 metra tartansprett og smellti tveim vatnsbrúsum í átt að Suðurlandsbrautinni. Uppskar brottvísun í kjölfarið.

Valsmenn eru áfram í fjórða sæti og að þessum leik loknum verður erfitt fyrir Fylkismenn að fara ofar en í sjötta sætið sem þeir sitja í þessa stundina. Ef þeir fara ekki að fylla upp í götin í varnarleiknum gætu þeir sogast niður í fallbaráttu, en varla þó.

Miðjan hjá Fylki átti erfitt, sérstaklega í fyrri hálfleik þegar hægt var að leggja flugvél í svæðin sem Valsmenn fengu að spila inní. Ef þetta hefði verið eltingaleikur hefðu fáir Valsarar verið klukkaðir fyrstu 45 mínúturnar.

Iwan Griffith átti fínan dag. Það er vert að skoða hvort Fylkismenn áttu tilkall til vítaspyrnu í stöðunni 1-0 en hann setti línu snemma í dómgæsluna sem hann hélt leikinn á enda.