Tvö af klaufalegustu mörkum tímabilsins reyndust dýrkeypt fyrir Grindavík sem heilt yfir voru jafnvel ívið betri heilt yfir. En Keflavík voru með leikplan sem gekk einfaldlega upp, lágu þéttir til baka og sóttu hratt.

Vítaspyrnudómurinn er svona með því ótrúlegra sem maður hefur séð á þessu tímabili. Hrós á Ívar og Sigurð Inga fyrir að hafa dæmt þetta í sameiningu.

Keflvíkingar taka annan sigur sinn í deildinni og spyrna sér upp í þriðja sætið um stundarsakir.

Hlynur Örn Hlöðversson fær þennan titil í dag. Byrjaði ekki vel þegar hann gaf boltann þvert fyrir sitt eigið mark þegar hann stóð víðsfjarri eftir tæplega tveggja mínútna leik. Hrindir svo Gumma Magg og fær dæmt á sig víti í öðru markinu þegar boltinn var kominn langleiðina inn á miðsvæðið og allir menn farnir úr teignum nema Gummi.

Ágætis leikur heilt yfir frá Ívari Orra og hans mönnum, Sigurður Ingi Magnússon aðstoðardómari fær þó mest hrós að þessu sinni fyrir að hafa flaggað víti þegar boltinn var víðs fjarri.