Feykilegur baráttuvilji og samkennd Víkinga vann upp á móti gæðum Fjölnisliðsins. Sanngjarnt að liðin skiptu stigunum í hörkuleik, einum þeim besta í deildinni í sumar.

Rauða spjaldið á Emir Dokara undir lok fyrri hálfleiks er klassískt dæmi sem rætt verður á kaffistofunum í Snæfellsbæ og í Grafarvoginum á morgun. Emir kemur af miklum krafti inn í návígi með fótinn alltof hátt. Lendir í Lund Pedersen og Þorvaldur ekki í vafa. Menn á alla bóga með mismunandi skoðanir - sem er klassískt í slíku tilviki.

Fjölnismenn eru komnir upp í 27 stig og tímabundið a.m.k. í 2.sætið. Víkingar binda endi á 5 leikja taphrinu og lyfta sér 6 stigum frá fallsæti.

Mjög erfitt að finna út vondan dag hér í dag, ætla að velja tvo í það, Gunnar Már hefði þurft að leika betur í leik sem var eilítið sniðinn fyrir hann að klára. Hjá heimamönnum var Kramar Denis býsna tæpur oft í leiknum en barðist þó eins og ljón, átti sök á fyrra marki Fjölnis.

Gríðarlega reynslumikið teymi á Ólafsvíkurvelli í kvöld. Þorvaldur ákveðinn í sínum aðgerðum og stýrði leiknum af röggsemi. Sjónvarpið mun sýna vel atvikið sem hér er lýst til hliðar en hann var mjög nálægt því og alveg ákveðinn. Stórar ákvarðanir hjá aðstoðardómara númer eitt í dag og þar virtist sama á ferðum. Komu þó upp atvik í leiknum sem eilítið ósamræmi var hvenær var flautað og hvenær ekki.