Frábær sóknarleikur Valsara sér í lagi í fyrri hálfleik. Grindvíkingar komu linir inn í leikinn og Valsarar gengu á lagið. Geggjaðar afgreiðslur Pedersen auðvitað lykilatriði í því.

Mark númer tvö réð eilítið framgangi leiksins. Birkir átti full fasta sendingu upp vænginn sem virtist á öruggri leið yfir endalínu og þá í útspark en Kristinn Ingi spændi upp plastið og náði fyrirgjöf alveg að endalínunni sem Pedersen klíndi í markið.

Valsmenn á fullri ferð áfram í toppbaráttunni, Grindvíkingar misstu af tækifæri á að ná 4.sætinu og þurfa að pikka sig upp eftir skell.

Hægt að velja marga Grindvíkinga, held að Joensen verði fyrir valinu af nokkrum. Hann náði ekki mörgum snertingum á boltann í leiknum og átti bara rosa erfitt...reyndar eins og fleiri samherjar.

Flott frammistaða hjá tríóinu, allar lykilákvarðanir réttar og góð lína í gegnum leikinn. Leikurinn of auðveldur að dæma fyrir tíu en einfaldlega mjög góð frammistaða tríósins.