Blikarnir eru einfaldlega með betra lið. Breiðablik átti algjörlega fyrri hálfleikinn og hefðu átt að vera búnar að skora fleiri mörk að mínu mati. En þegar Selfoss skoraði á 70 mín. þá tóku þær yfir leikinn og voru sterkari þar til flautað var af. En heilt yfir sanngjarn Blikasigur.

Mark Selfyssinga. Vörn Blika var sofandi og Magdalena nýtti sér það og skoraði flott mark. Þetta mark breytti virkilega gangi leiksins. Blikastelpur urðu stressaðar og bökkuðu mikið á meðan Selfoss urðu hungraðari í jöfnunarmark.

Blikar halda 2. sætinu í deildinni með jafn mörg stig og Valur en lakari markatölu og Selfoss situr áfram í 4. sæti deildarinnar.

Mér fannst engin ein eiga sérstaklega slakan leik í dag. Langar samt að nefna aðeins Blikaliðið í heild eftir að þær fengu á sig markið, þá panikkuðu þær og Selfoss hefði auðveldlega getað jafnað leikinn. Þetta er svipað og gerðist hjá Blikum gegn HK/Víkingi.

Æ mér fannst Andri ekki eiga góðan dag. Ekkert margar stórar ákvarðanir að taka svosem en mikið um skrítnar aukaspyrnur í dag. Fannst hann á tímabili bara hlusta á stúkuna og það er aldrei gott fyrir dómara.