Valsmenn kláruðu færi en KR ekki. Mjög jafn leikur í gamaldags baráttuleik þar sem öllu máli skipti að nýta færin. Svo auðvitað að standa vörnina. Meistararnir gerðu það og hirtu sigur sem gat lent báðu megin.

Áður bent á tvöfalda vörslu Hannesar en lykilmóment leiksins er þegar að Kristján Flóki og Kjartan Henry eru skyndilega tveir einir gegn Hannesi í markteignum. Flóki valdi að skjóta á markið, beint á Hannes í stað þess að renna boltanum á Kjartan sem hefði ekki getað brennt af. Stuttu síðar skora Valsmenn úr mjög svipaðri stöðu.

Valsmenn eru komnir með 4ra stiga forystu á toppnum og slíta sig aðeins frá pakkanum. KR eru áfram í 5.sæti og nú þarf ansi margt að gerast til að Vesturbærinn fái meistaratitil.

Sóknarlínan hjá KR náði ekki að nýta sér færin eins og kemur fram í atvikinu og vali á manni leiksins en það vantaði líka pínulítið bara upp á áræðnina á síðasta þriðjungi, taka eitt og eitt langskot og fylgja fast á eftir þeim möguleikum sem gáfust. Að öðru leyti er hægt að hrósa báðum liðum fyrir bara mjög öflugan fótboltaleik tveggja góðra liða.

Ívar var í stóru hlutverki í kvöld. Það var hasar frá mínútu 1 til mínútu 97 og hann náði fínum tökum á línu sem hann hélt að mestu í gegnum leikinn. Hann átti þó að spjalda Hauk Pál í fyrri hálfleik og í blálokin var kannski aðeins of mikill flautuleikur í boði. Heilt yfir getur teymið labbað sátt af velli í þrælkrefjandi leik.