Sigurður Heiðar Höskuldsson talaði um að sínir menn hafi aldrei byrjað þennan leik og verið undir í allri baráttu á vellinum. Þar verð ég að vera sammála honum því Keflvíkingar virkuðu bara mun tilbúnari í þennan slag og uppskáru eftir því.

Lengi getur vont versnað segir máltækið. Viktor Freyr Sigurðsson og Bjarki Aðalsteinsson lentu í samstuði á fimmtu mínútu sem varð til þess að Viktor missti nokkuð öruggan bolta úr höndum sér fyrir fætur Adams Ægis sem skoraði fyrsta mark leiksins. Eins og það væri ekki nógu slæmt heldur þurfti Bjarki að yfirgefa völlinn vegna meiðsla.

Keflavík fer í fjögur stig og lyftir sér upp í 9.sæti deildarinnar. Leiknir er enn með tvö stig og situr í 11.sæti.

Það er svo sem af nógu að taka eftir þennan leik en ef tölfræði Leiknis er skoðuð verðum við að setja þetta á sóknarmenn liðsins. Ekki bara fyrir leikinn í kvöld heldur fyrir afleita tölfræði liðsins fyrir framan markið. Fjögur mörk í síðustu þrettán deildarleikjum er hlutur sem að Leiknismenn hljóta að hafa gríðarlegar áhyggjur af og leggja allt kapp á að laga.

Solid sjöa. Engin stór atvik til að tala um bara fín leikstjórn og rólegheita dagur hjá Einari.