Valur skoraði en Breiðablik ekki. Það er svona skýrasta svarið. En Blikar fengu fullt af marktækifærum í kvöld sem þeim tókst ekki að nýta, auk þess sem þær klikkuðu á vítaspyrnu. Valur átti ekki jafn mörg marktækifæri en náðu að nýta sér hornspyrnu þar sem Arna Sif skoraði með skalla.

Vítaspyrnan á 83. mínútu. Melina Ayres stígur á punktinn og getur jafnað leikinn en Sandra les hana og ver frábærlega.

Valskonur hirða toppsætið og skilja Blika eftir í rykinu. Breiðablik er með 9 stig í 6. sæti deildarinnar eftir 6 umferðir og eru komnar 6 stigum á eftir Val.

Blikum gekk illa að skora mark, en þær fengu nóg af tækifærum til þess. Melina Ayres hefur átt betri daga í grænu treyjunni en hún virkaði ekki sannfærandi í þessum leik. Virtist ekki vera með tímasetningar og staðsetningar á hreinu þegar fyrirgjafir komu fyrir markið og getur svo jafnað leikinn en brennir af vítaspyrnu.

Fínn leikur hjá Vilhjálmi en það voru nokkur vafaatriði sem voru óljós. Blikar vilja tvisvar fá víti þar sem varnarmenn Vals fengu bolta í hendi og Valskonur vildu vítaspyrnu þegar Ásta Eir fékk boltann í höndina skömmu eftir mark Vals. Þarf að sjá þetta endursýnt en við fyrstu sýn virtist þetta klárlega vera víti á Ástu. Svo fá Blikar vítaspyrnuna sem enginn virtist sjá, en Vilhjálmur var alveg ofan í atvikinu og virtist alveg með það á hreinu svo ég treysti því.