Blikakonur voru einfaldlega númeri of stórar í dag fyrir Keflavík. Voru alltaf skrefi eða tveimur á undan og réðu lögum og lofum hvert sem litið var á vellinum. Á sama tíma var Keflavíkurliðið nokkuð slegið og ráðalaust og úrslitin eftir því.

Erfitt að taka annað en rauða spjaldið sem ég var nokkuð viss um fram að hálfleik að væri réttur dómur. Mér fróðari menn og konur segja svo ekki vera og að Júlía megi alveg vera súr yfir að hafa fengið að líta sitt annað gula spjald og þar með rautt eftir 27 mínútna leik.

Breiðablik skellir sér í sex stig og fer tímabundið á topp deildarinnar. Þar fá þær að vera til morguns en annað hvort Valur eða Þróttur eða jafnvel bæði lið fara uppfyrir þær á morgun eftir því hvernig innbyrðis leikur þeirra fer. Keflavík situr í fimmta sæti með fjögur stig.

Keflavíkurliðið mátti sín lítils gegn Blikum í kvöld og getur mun betur. En Júlía Ruth Thasaphong sem í kvöld lék sinn fyrsta deildarleik fyrir Keflavík átti líklega versta daginn. Fær dæmt á sig víti og gult og fær svo annað gult og þar með rautt stuttu seinna þó deila megi um réttmæti þess. Hún verður því í leikbanni næst en hefur það vonandi í huga að það er einkenni góðra leikmanna að rísa upp er á móti blæs og bæta ennfrekar í.

Leikurinn var kaflaskiptur hjá Bríeti að mínu mati. Ég er nokkuð sannfæræður eftir samtöl við gott fólk eftir leik að seinna gula spjald Júlíu og þar með það rauða hafi verið rangur dómur sem er dýrt fyrir lið eins og Keflavík. Einnig fannst mér hún missa tökin á leiknum á þeim kafla og gera helst til of mikið til þess að freista þess að ná tökum aftur á leiknum auk þess sem Blikar áttu líklega að fá annað víti í fyrri hálfleik. Leikurinn róaðist sem betur fer í síðari hálfleik og fór minna fyrir henni þá og tök hennar á leiknum urðu betri.